Пошкырт мландыште талантым кычалына

М.С.Щепкин лÿмеш Кÿшыл шинчымашан театральный училище (институт) актёр факультетшын национальный курсышкыжо самырык марий ÿдыр-рвезе-влакым тунемаш налме нерген увертара.

Абитуриент-влак тунемаш пурымо экзаменым кучымо деч ончыч тергымашым (отборочный консультацийым) эртышаш улыт.

Тергымашым виктарен шогышо комиссий апрельыште марий калыкын тÿшкан илыме моло кундемышкыжат миен шуэш.

Комиссий Пошкырт кундемысе:
Нефтекамск олаште — 11 апрельыште 11 шагатлан 13-шо номеран школышто,
Калтаса селаште — 12 апрельыште 11 шагатлан районын Культура полатыштыже,
Мишкан посёлкышто — 13 апрельыште 11 шагатлан Ешартыш образований учрежденийыште
пашам ышта.

Кумылан кажне ÿдыр-рвезе кутырен моштымо, образым раш да чын чоҥымо мастарлыкым, произведенийын шонымашыжым умылен моштымым ончыктышашлан наизусть лудаш басньым, почеламутым, проза дене возымо произведений гыч ужашым (кажне жанр дене кокыт деч шагал огыл) рушла да марла ямдылышаш. Тыгодым классикыш савырныше авторынат да кызытсе сылнымут гыч произведенийымат налман. Но нуно возымо ойыртем (стиль) да жанр шот дене ойыртемалтшаш улыт.
Чыладамат кумылын вучена!

shketan.ru

Добавить комментарий