Ятыр еҥлан полышна лачеш толын

Таче У Торъял районышто тӱшка озанлык-влак кокла гыч «Первый май» колхозак веле пашам икшырымын ышта. Тудо кум шӱдӧ еҥлан паша верым пуэн. Пасу тургым годым эше икмыняр еҥым жаплан пашашке налеш. Ты озанлык тӱҥ шотышто райрӱдӧ воктен ялласе калыклан паша верым пуэн гын, мӱндыр велныже ятыр еҥ пашадыме радамыш логалын. Нунын кокла гыч шукыштлан пашам ситарыме рӱдерыш учетыш шогалаш пернен.

Кугыжаныш ты учреждений нелылыкыш логалше-влаклан шке пашам виктарен колташ йӧным ышта, полышым пуа. Тыге кодшо ийын гына районысо шымлу кандаш еҥ, 58,8 тӱжем теҥгем налын, предприниматель радамыш шогалын. Нунын кокла гыч икмынярже эше коло ик ешартыш паша верым почын. Рӱдер кажне ешартыш паша верлан тыгак 58,8 тӱжем теҥгем тӱла.

— Паша деч посна кодшо-влак лачак пособий дене гына ынешт иле, йӧн улмо семын могай-гынат сомылым виктарен колташ кумылан улыт, — каласкала пашам ситарыме рӱдер вуйлатыше А.А.Воронцов. — Теве предприниматель радамыш шогалаш кумылан-влак деч ӱстембалнем кудло йодмаш кия. Кызытеш кумло кандаш еҥлан оксам налынна. Кумло кок еҥын бизнес-планжым онченна. А молышт тыгай документым эше конден огытыл. Коло кудытын налог инспекцийыш шогалын шуктеныт. Пашадыме эше куд еҥлан окса толшаш. Теве кызыт Марий Эл Республикысе калыклан пашам ситарыме кугыжаныш служба департамент вуйлатыше лӱмеш мыланна эше кумло-нылле еҥлан ешарен полышым пуаш йодмашым возем. Район администраций тений кажне поселений кундемыште калык дене вашлиймаш кече-влакым эртарен. Тушко районысо чыла гаяк служба пашаеҥ-влак миеныт да шке пашашт нерген каласкаленыт, лекше йодышлан вашмутым пуэныт. Мыят паша рынкыште могай сӱрет палдырнымым радамленам. Тылеч вара кугыжаныш полышлан эҥерташ, предприниматель-влак радамыш шогалаш кумылан-влак ешаралтыныт.

Предприниматель-влак кокла гыч шукынжо тӱкан шолдыра вольыкым ӧрдыктарат. Пасу пашам ыштыше, торговльыш ушнышо-влакат улыт. Эртыше кок ийысе опыт ончыкта: вольыкым ӧрдыктараш полышым налше-влак, талук эртымеке, предприниматель-влак радам гыч кораҥыт, регистрацийым уэш огыт эрте. Ик тӱҥ амалже — предпринимательлан шотлалтме годым налогым тӱлыман да изим огыл. А вольык ончымо дене тӱҥалтыш ошкылым ыштымек, шукынжо пашам умбакыже шуят. Тӱҥалтыш капитал погынымек, южыжо эше кредитым налеш да шукырак сатум ыштен налаш шона.

Тений у пашашке ушнышо-влак кокла гыч икмынярышт дене палдараш уто огыл. Теве Токтарсола гыч А.А.Матвеев чоҥышашлык панель блокым лукташ ямдылалтеш. Тудо пашашке ялысе эше ныл еҥым налеш. Пашам ситарыме рӱдер гыч нунын кокла гыч кокытшылан кажныжлан 58,8 тӱжем теҥгем ешарен тӱлымӧ. Ты окса дене оборудованийым, материалым налыт. Опытым шымлаш Александр Анатольевич Татарстаныш миен коштын. Могай оборудованийым налме, кондымо шотыштат ончылгоч кутырен келшен. А предприниматель шонымашкыже шуэш, сатум ямдылаш тӱҥалеш гын, ялыште пӧртым нӧлтышӧ-влак панель блокым кумылын налаш тӱҥалыт ыле. Тудо — моло материал дене таҥастарымаште шулдырак.

Тошто Торъял гыч А.Г.Богачов куд гектареш пареҥгым ончен кушташ палемден. Тудлан паша рӱдер полышым кодшо ийын пуэн. А тений Александр Геннадьевич эше ик паша верым почаш лийын. Сергейсола гыч Р.С.Секретареват паша рӱдерын полышыжлан эҥертен. Тудын кум шӱдӧ гектар мландыже уло. Тений шошым икияшым ӱдышаш пасум кодшо шыжымак куралын коден. Кызыт минеральный ӱяҥдышым конда. Шурным шийме комбайнже, тракторжо, моло техникыже улыт. Шке вӱташтыже коло наре вуй тӱкан шолдыра вольыкым ашна. Эше калык деч уто шӧрым поген, Шернур ӱй да сыр заводыш шупшыкта.

В.Смоленцев

Снимкыште: А.А.Воронцов яллашке предприниматель-влакын пашашт дене палыме лияш лектын

Добавить комментарий