Марий калыкын культурыжым ончыктеныт

2011 ийым Башкортостан Республикыште Калык кокласе келшымашым пеҥгыдемдыме идалык семын лÿмдымö. Башкортостан Президент Р. Хамитов Правительствын Постановленийжым подписатлен. Тушто Башкортостан Республикысе калык-влакын йылмыштым вияҥдыме, аралыме шотышто 2006-2010 ийлан ямдылыме кугыжаныш программым 2011 ий марте шуйымо нерген ойлалтеш.

Тудым пеҥгыдемдаш манын, Дöртыльö историй да краеведений музейыште “Марий костюмын поэзийже” выставка почылто. Выставкым районысо администраций вуйлатышын алмаштышыже Р. М. Вагапов да Дöртыльö районысо Мер каҥашым вуйлатыше В. С. Сафаров почыч. “Марий калык — уста калык. Нуно тыршышан, йöным муын моштышан улыт. Моло калык коклаште шке йылмыштым, культурыштым йомдарен огытыл”, — мане Р. М. Вагапов.

Дöртыльö районышто индеш марий ял (Ангасяк, Йывачъял, Чарлак, Елтек, Маядык, Искуш, Ярмия, Турбек да Аргыш) уло. Чылаже кум тÿжем утла марий моло калык дене каҥашен, келшен ила. Шукышт марийын лÿмжым, чапшым кÿшкö нöлтеныт да нöлтат. Мутлан, Чарлак ял гыч Аркадий Алексеевич Сергеев редактор, «Марий Эл» ВГТРК-н дикторжо улеш, Василий Галимьянович Каписов — Марий Эл Республикысе Куженер район администраций вуйлатыше, Юрий Иксанов — поэт, Виталий Вячеславович Паходный – ФСБ-н подполковникше, Маядык ял гыч Валентина Афанасиевна Выдрина — химий наука кандидат, Надежда Семеновна Иляева — Россий образованийын почетный пашаеҥже, Россий Президентын грантшым сеҥен налше-влак кокла гыч иктыже, Алексей Андреевич Атыев – БАССР-ын заслуженный туныктышыжо, Мефодий Иванович Петров — Башкортостан культурын заслуженный пашаеҥже да молат.

Дöртыльö районысо 8 школышто 112 тунемше марий йылмым тунемеш, индеш школышто 353 тунемше марла тунемеш. 10 туныктышо марий йылме ден литературым туныкта.

Районышто илыше тÿрлö калык курым-курымеш ик ешла келшен ила, нелымат пырля сеҥат, пайремымат пырля эртарат, марий “кандырамат” пырля куштат. Таклан огыл республикыште Калык кокласе келшымашым пеҥгыдемдыме идалыкым марий калыкын илышыж дене кылдалтше мероприятий дене тÿҥалыныт. Выставкыште ыштыме стенд, экспонат-влак марий калыкын илышыж нерген ойлышт.
Музей директор Р. Б. Имамова да пашаеҥже Л. Е. Валишина ден Л. Н. Шарафутдиновалан поро пашам ыштымыштлан кугу таум каласена.

В. ГАЛЕЕВ
Дöртыльö район

Добавить комментарий