Олан у чемпионжо

В. А. Трифонов латкум ий почела шахмат дене модмаште Нефтекамскын чемпионжо лийын. Шукерте огыл олаште эртыше турнирыште тудо молгунамсе гаяк виян модын, сеҥыше деч пел очколан гына шагал поген. Ты гана чемпион лÿмым Амзя гыч 24 ияш Д. Хохряков сеҥен налын.

Димам Нефтекамскыште да Амзя поселкышто сай профессионал-пианист, неле классический произведений-влакым шоктышо семын палат. Тудо эше оласе духовой оркестрыште тубым (эн ÿлыш тонан духовой семÿзгарым) шокта, коллектив дене концертлаште, пайремлаште участвоватла. Самырык рвезе компьютер дене программа-влакым куштылгын ышта. Техникым да компьютерым сайын умылымыжо шахмат кучедалмаште да тудын теорийжым шымлымаште ончыко каяш чот полша. Туге гынат, турнир модмаште вийым тергыде, усталыкым тапташ огеш лий. Идалыкат пеле жапыште Д. Хохряков оласе чыла клубын таҥасымашлаштыже гына огыл, республикын моло олалаштыже, республика деч öрдыжсö турнирлаште шахмат дене модын. Мутат уке, чыла веркат тудо шкенжын шийвундыж дене коштеш. Кастене Амзя гыч Нефтекамскыш модмашыш толашат куштылго огыл, сандене Дима кид гыч “Ока” машинам налын.

Шукерте огыл экс-чемпион В. А. Трифоновын темлымыж дене, Дима ден тудын коклаште ныл партиян матч эртен. Икымше партийыште В. Трифонов, кокымшо ден кумшышто Д. Хохряков сеҥеныт, нылымшыште ничья лийын. Дима, 2,5 очком поген, чемпионлык праважым пеҥгыдемден.

И. НАБИУЛЛИН
Нефтекамск ола

Добавить комментарий