Вуйым сакыман огыл

“Ме пÿртÿсыштö молан кеҥеж шокшо лиймын амалжым огына кычал, кукшо игечын эҥгекшым ужашат кöраза лияш огеш кÿл”, — манеш Крупская лÿмеш племзавод ООО-н генеральный директоржо И. А. Садретдинов. Кодший кеҥежымсе шокшо колхозын экономикыжланат, колхозникын илышыжланат, ончыкылык продукцийланат шагал огыл эҥгекым кондыш. Мланде шелын кайымеш кошкыш гынат, племзаводын коллективше пÿртÿс ончылно вуйым ыш саке, пашам ышташ кумылым ыш йомдаре: чыла ÿдымö шурным, кургылык культурым поген нале.

Моло ийласе дене таҥастарымаште, ик кумшо ужаш шурно пырчым гына поген налме. Палемдыме 400 гектар уржам ÿдымö. Шыжым йÿр лийдымылан кöра кокияш озымын лектышыже начар лие, тудо сентябрьысе пытартыш  йÿр дене гына нöлталалте. Кузе телым илен лектыт, иктат ок пале, мланде кылмен огыл, да эше, лум ÿмбач йÿр йÿрын, ий леведе.

Вольык кочкышат ситышашлык ямдылалтын огыл — кÿлеш наре гыч пелыже гына. Туге гынат 16500 центнер шöрым, 1020 центнер шылым ямдылыме. Ик ушкал деч 4600 килограмм шöрым лÿштен налме. 2010 ийыште племзаводын рентабельностьшо 29% ыле. Кушеч кукшо ийыште тыгай  рентабельность манын, öршаш уке. Кодшийлан чылаже 8 миллион 13 тÿжем теҥге субсидий тÿлалтын. Тышеч племенной озанлык семын да урлык вольыкым ужалымылан — 3 миллион 14 тÿжем теҥге, ГСМ-лан — 202 тÿжем теҥге, кредит налмылан — 430 тÿжем теҥге, минеральный ÿяҥдышлан — 118 тÿжем теҥге. Кукшо ийыште налдыме кургылан, кошкен когарген пытыше шурнылан да тудым ончен кушташ кучылтмо окса да вий олмеш  — 4 миллион 249 тÿжем теҥге.

Тений 2011 ийыште 86 вуй урлык пашмакым моло районлаш ужалыме. Племзаводын кассышкыже 3 миллион 344 тÿжем теҥге пурен. Ик вуй пашмак кокла шот дене 39 тÿжемлан ужалалтын. Ял озанлыклан кугыжаныш огеш полшо манын, нигузе каласаш огеш лий. Кажне нылымше теҥге оксам кугыжаныш компенсироватла. Полыш шагалрак гынат, ял озанлыклан тидат уда огыл эҥертыш.

Чыла ушкалым арален кодаш манын, племзавод,  ешарен, 101 тонн силосым, 70 тонн олымым, 20 тонн шудым, 451 центнер фуражым нале. Специалист, доярка, вольык ончышо-влак ончылно кугу задача шога — кургым аныклен пукшен, телым илен лекташ да шукырак продукцийым налаш. Зоотехник И. Сафиуллин, ветврач Н. А. Самлиев, озанлык вуйлатышын кургым ямдылыме шотышто алмаштышыже Е. Ш. Исляев, бригадир И. Шангареев тыгай задачым умылат да кугу кÿкшытыш шуаш чыла вийыштым пыштат. Нуно эре фермыште, калык коклаште улыт. Доярка-влак С. А. Егорова, А. И. Тимирбаева, З. Г. Каликаева, Л. И. Исанова, вольык ончышо Г. А. Алетдинов, А. А. Мухаметдинов пашам тыршен ыштат.

Пасу паша, кушкылым ончен куштымаш ончылно огыт кай гын, вольыкым ашнымаштат  сай продукцийым налаш огеш лий. Таклан огыл «Шöр ушкал йылмыште»  маныт, тыгак вольык ашнымаште ушкал, курго, кадр-влак тÿҥ улмым чÿчкыдын палемдат. Нуно икте-весышт дене чот кылдалтыныт гын,  шöрат, шылат лиеш.

Озанлыкыште ончыкыжат урлык вольыкым ончен кушташ шонат. Кызытсе  неле жапыште вольыкым ончен куштымаш веле утара.

Ял озанлыкыште кугу верым пасу пашан, фермын шÿмжö — трактор парк налын шога. Пытартыш ийлаште “Полесье” силос погымо комбайным, МТЗ-1221 тракторым, пресс-подборщикым, “Омичка” сеялкым, дробилкым налылтын.

Тений люцерным ÿдымö кумдыкым 100 гектарлан кугемдаш шонат. Тугак кукурузым 50 гектарлан шукырак ÿдат. Тиде культурым, пасум кошта манын,  севооборот гыч кораҥденыт гаяк ыле. Но тачысе кечын мемнан условийыште тудо шöр пуышо эн сай культура улеш.

И. А. Садретдинов шуко механизаторым мокталтен кайыш. Тиде В. М. Алетдинов, В. К. Каликаев, С. С. Давлетбаев, М. Камалиев, П. Янситов, А. Яныбаев, А. М. Шаяхметов, В. А. Исаков. Нунын коклаште рвезе тракторист Р. И. Исанов уло кумыл дене тыршен ышта. Поснак моктен каласыш спецтрактор дене пашам ыштыше С. С. Янсубаевым. Нуно чылан ÿшанен пуымо ял озанлык машинаштым шошо агалан ачален  коденыт. Кызыт слесарь-влак кушкыл вожыш ешартыш удобренийым пуаш сеялкым ачалат. Ÿшаныме шуэш, Крупская лÿмеш озанлыкыште ончылно шындыме задачым шуктат да у кÿкшытыш шуыт.

В. ГАЛЕЕВ
Искуш ял, Дöртыльö район

Добавить комментарий