Ӱярня мелнана когарген огыл

Кодшо рушарнян, 6 мартыште, уло эл Ӱярням рӱжге пайремлыш. Олаштат, ялыштат мелнам кӱэштыныт, мыскарам ыштеныт, модыныт, мурым муреныт да куштеныт. Марий Элнат почеш ыш код. Республикынан рӱдолаштыже икмыняр вере  телым ужатыме пайрем гӱжлен. Мутлан, Чарла кремльыште, культура да каныме паркыште  весела кумылын шошым вашлийыныт.  А марий Ӱярня йӱлам тӱрыс почын пуышо тӱҥ пайрем тиде гана У Торъял районысо Овалже ялыште лийын.

Тушко республикысе  шуко кундем гыч ятыр фольклор коллектив да марий пайрем йӱлам пагалыше еҥ миен. РФ Госдумын депутатше, Мер Каҥашын председательже Л.Яковлева,  культура печать да национальность паша шотышто министрын алмаштышыже Г.Ширяева, «У Торъял  муниципальный район» администрацийым вуйлатыше  В.Блинов пайремын тӱҥ унаже лийыныт.

Немда. Эше теҥгече тудын серыштыже поран ӱштын, а таче эрдене шошо велыш тайныше кече шырата. Овалже ялысе клуб воктене автобус  ятыр погынен.  Шашлыкым кӱкташ, мелнам кӱэшташ ыштыме тул олмыла  велым шуйналтше шикш дене пырля тамле пуш умбаке шарла. Чыла велым  калык  ял покшеке погына. Пайрем тӱҥалмым вучышыла, ик жап  тымык шогыш. Но теве ты тымыкым весела гармонь йӱк кӱрльӧ. Марий калыкын йӧратыме Ӱярня пайремжым ший оҥгыр йӱкан, тӱрлеман сылне марий вургемым чийыше ӱдыр-влак мурышт дене почыч. Кинде-шинчал да арака чарка. Нуным тамлыде, пайремыш от логал. Тыге Немда калык лӱм дене тысе «Эрвий» фольклор коллектив шергакан уна-влакым вашлие.

Культура пӧрт воктене калык лыҥ погыныш. Чыланат фольклор коллектив-влакын коча-кованан Ӱярням пайремлымыштым модын ончыктымыштым вучат. Вет ожно кажне районышто, кажне ялыште гаяк телым ужатыме да шошым вашлийме шке пайрем йӱлашт лийын.  Теве Кугу Лумарий гыч фольклор ансамбль  шочшо гына азалан лӱмым пуымо, а «Эрвий» мӱндыр родым вашлийме йӱлам модын ончыктышт.  Кузнеч культура пӧртын «Келшымаш» ансамбльышкыже коштшо самодеятельный артист-влак  «Кинде-шинчал дене сийлымаш»  да моло сценкымат ончыктышт. Куженер ден Советский районла гыч, тыгак И.Палантай лӱмеш Марий культура да искусство колледж гыч творческий коллектив-влак  кумылым утларак нӧлтальыч да пайремым эшеат веселаракым ыштышт.

Ты пайрем мероприятийым организоватлыше Марий культура рӱдер пашаеҥ-влакын мутышт почеш, республика кӱкшытыштӧ Ӱярня Марий Элын йӱдвел-эрвел кундемыштыже икымше гана эртаралтеш. Мутат уке, икымше мелна когарген огыл. Немда кундем калыкат тидым палемдыде ыш кодо, вет, чынжымак, тыгай кугу пайремым шкешт дене нуно шукертсек ужын огытыл. «Издер дене мунчалтымаш», «Вӱдлан волымаш» да тулеч моло весела конкурс-шамыч кужу жаплан калыкыште шарнаш кодыч.

Д.Речкин

Авторын фотожо

Добавить комментарий