Пашада дене кугешнена

Свердловск кундемыште Тавра лӱман кок ялым палем: Кугум да Изим. Кугу Тавра Красноуфимск районышто верланен, а Изи Тавра – Арти районышто. Кок вережат марий-влак шке илыш-йӱлаштым жаплен илат.

Поснак Изи Таврасе тӱвыра пӧрт пашаеҥ-влакым моктымо шуэш. Вате-марий Александровмыт (Виктор Афанасьевич — СДК вуйлатыше, а Маргарита Ильинична «калык» лӱмым нумалше «Чолга шӱдыр» фольклор ансамбльым вуйлата), библиотекарь К.П.Яшкина да художественный вуйлатыше Г.С.Давлетбаева шочмо калыкын тӱвыражым, йӱлажым, йылмыжым арален да вияҥден колтымаште чот тыршат. Шуктымо пашашт дене шке ялыштым да ял дене пырля марий калыкымат чапландарат. Февраль мучаште теве Красноуфимск олаште эртыше область кӱкшытан «Ме Уралыште илена» фестивальыште 50 коллектив да 500 еҥ кок­лаште мастарлыкыштым ончыктеныт. Ноябрьыште «Созвездие Урала» конкурсышто «Чолга шӱдыр» ансамбль хореографий дене кокымшо верым налын. Моло конкурсла гычат эре призовой вер дене пӧртылыт.

Тӱвыра пӧрт пашаеҥ-влак самырык тукымымат шочмо калыкын поянлыкшым аклаш шӱмаҥдат. Изи Тавра школын изирак класслаштыже тунемше-шамыч «Изи шӱдыр» ансамбльыште мурен-куштат. Ӱдыр-влакым Г.С.Давлетбаева тыгыде шер дене тӱрлӧ арверым пидаш туныкта. Тудденак Урал марий ватын оҥеш сакыме сӧрастарыме ӱзгаржым  (ягам),  марлан кайыше ӱдырын вуйчиемжым (такьям), шнашовычым тыршен сӧрастарат. Вес кружокышто К.П.Яшкина тӱрлӧ шӱртӧ дене ӱштым пидыкта. Шкеже шукертак ты сомыллан шӱ­маҥын, кызыт парняже-влак модыт веле. Тыгак марий тӱрым тӱрлышӧ кружок пашам ышта. СДК-ште кум станокышт уло. Иктыж дене Урал вел марий вургемым ургышаш йошкар-шем тӱсан вынерым куат.

Изи Тавра СДК коллективын пашажым районыштат аклат. Шукерте огыл нунылан «Соболь» машинам пуэныт. Ынде концерт дене лекташат, райцентрыш миен толашат пеш йӧнан.

Пашада ушнен толжо манам, мӱндыр Свердловск кундемыште илыше марий-влак! Тендан шӱм-чон поянлыкдам, тыршымыдам ужын, весат шотыш налже да шоч­мо калыкын ончыкылыкшым тӱзаташ мом кертмыжым тачак илышыш шыҥдарыже.

А.ЭМАНОВА

Снимкыште: Г.С.Давлетбаева, М.И.Александрова, К.П.Яшкина, СДК-н ончычсо вуйлатышыже Е.С.Мулюкова (кызыт йоча садыште паша ышта). 2008 ий

Авторын фотожо

Добавить комментарий