Мланде пашаеҥ-влак шошо агалан ямдылалтыт

Республикысе мланде пашаеҥ-влак шошо агалан ямдылалтыт. Кызыт кокияш культур-влак кузе телым эртарымым тергат. Кокияш уржа чумыр кумдык гыч 2-3 % кылмен, шыдаҥ – 7 гыч 10 % марте. Тугеже чыла пашам жапыштыже да писын шуктыман. Икияшым ӱдашлан ӱмаште шыжым 82 тӱжем гектар мландым кылмаш куралме, а кокияшым 55500 гектарыште ӱден кодымо.

Ял озанлык министр Александр Егошинын мутшо почеш, тений пырчан культурын ӱдымӧ кумдыкым 12000 гектарлан ешарыман. Тыге чумыржо 153 тӱжем гектар лиеш. Пырчан культурым утларак кумдыкышто вераҥдат Оршанке, Шернур да Советский районлаште кугу агрохолдинг-влак. Нунын коклаште «Марийское» акционер ушем, «Акашевский» чыве фабрика, Йошкар-Ола шыл комбинат, «Шойбулакский» племзавод.

Валерий Очеев

Добавить комментарий