Вагон водыж

Пӧрт кӧргыштӧ ласкалыкым арален илыше суртводыж улмо нерген шуко колынна. Тыгаяк оза-влак теве поездысе вагонлаштат илат улмаш. Тидын нерген мылам Набережные Челны воктенсе Круглое поле посёлкышто илыше да проводницылан пашам ыштыше Зоя Ямбаевна Халитова каласкален.

Проводница-влак вагон озам шке коклаштышт «вагон аралтыш» маныт. Ик ӱдырамаш ик вагоныштак ятыр ий пашам ыштен, но вуйлатыше-влак тудым вес вагоныш кусареныт, олмешыже угыч толшо ӱдырым шогалтеныт. Тиддеч вара вагонышто ласкалык пытен. Вагон аралтышет у проводницылан эреак ӱчым ыштылын: я стакан-влакым пудыртылын, я шокшо вӱд краным чӱктен, я арвер-шамычым шылтеден. Кужу жап пашам ыштыше проводница-влак самырык ӱдырлан шижтареныт: «Тый вагон аралтышлан келшен отыл, туддеч утлаш кӱлеш». Ты ӱдырет мо ышталтме нерген ончычсо проводницыжлан радамлен пуэн. Тудыжо «йолташыжым» налаш толын, «Айда, пеленем наҥгаем» манын, вагон водыжым вачышкыже шындыме гай ыштен да шкеж деке ошкылын. Тиддеч вара самырык проводница ласкан шӱлалтен.

А.Эманова

Добавить комментарий