Шеҥше йыдалым шукын палат

— Йыдалым тодаш кид виет веле ситыже, — манеш шукертак пенсийыш лекше, но яра шинчен туркыдымо П.И.Павлов.

Шеҥше велне тудым тале кидмастар семын палат. Йыдалым шкежат изиж годсек, эше школыш коштмыж годымак, чиен. Кодшо курымысо 50-ше ийлаште калык пеш нужнан илен, эн жаплыме йолчием тунам йыдал лийын. 1960-шо ийла кыдалне веле йыдал дене коштмым чарненыт. Шукынжо тудын деч вожылыныт, ботинкым налаш тӱҥалыныт.

— Панти изам тошто йыдалым каркалаш кучыктен пуа ыле. «Тунем шумешкет уым тӱҥалаш итат шоно, локтылат» манын.  Cӱзлым ний коклаш торен чыкалтет, калыпеш ний пелен весе арун возеш. Вара йыдал кандырам пунет.

Пантелей Иванович кандыраш сакыме иктаж  лу наре ямде йыдалжым кӱвар ӱмбаке луктын пыштыш. Ик мужыржо – калош.

— Заказчикат лектыт:  Йошкар-Оласе М.Шкетан лӱмеш театрлан,  Чебоксар оласе, верысе тоштер-влаклан тодам. Йодмо почеш пошкудо Татарcтаныш да моло вере колташ шуко ыштенам. Ик мужыр йыдаллан латныл ний кая. Тудыжым чодыраште кушшо писте шӱм гыч перкален  да пӱтырен ойырен налам, йыдаллан йӧршым ниялам. Чыла тидым ышташ жап ятыр эрта. Южгунам ик мужырым кум кечыште тодам.

М.СКОБЕЛЕВ

Морко район

Снимкыште: теве могай мотор улыт П.И.Павловын йыдалже-влак

Авторын фотожо

Добавить комментарий