Пашам аралыме шотышто смотр-конкурс эртаралтын

Республикысе муниципальный образований-влак коклаште кодшо ийын пашам аралыме шотышто смотр-конкурс эртаралтын. Кодшо кечылаште Калыкым социально аралыме да паша министерство тудым иктешлен да сеҥыше-влакым палемден.

Ончыл верыш Оршанка район лектын. Кокымшо верыште – Килемар район, кумшышто – Волжск ола. Тылеч посна изи да кугу предприятий-влак коклаштат ойыртемалтше-влакым палемденыт. 15 гыч 100 наре еҥан предприятий-влак коклаште сеҥышыш Оршанка районысо вольык чер ваштареш кучедалше станций лектын. Шернур районысо «Чоҥымаш да олмыктымаш» ден «Оршанка кинде» ушем-влак кокымшо ден кумшо лийыныт. 100 гыч 250 марте еҥан предприятий-влак коклаште Волжскысо гидролиз ру завод сай могырым палемдалтын. А тылеч утларак еҥан предприятий-влак коклаште Морко районышто верланыше «Нижний Новгород Газпром трансгаз» ушемын филиалже сеҥышыш лектын.

Муниципальный образованийлаш пурышо организаций-влак коклаште Шернур посёлкысо 1-ше №-ан школ эн ончыл верым налын. Сеҥыше-влак министерствын Почётан грамотыж дене палемдалтыныт.

Валерий Очеев

Добавить комментарий