Российыште калык шагалемын

Российыште 2010 ийыште калык шотлымашым иктешлаш тӱҥалыныт. Эртыше 8 ий жапыште элыштына калык шагалемын, кызыт Российыште 142 миллион 905 тӱжем еҥ ила. Тыгодым Москваште илыше-влак 10,9% ешаралтыныт. Кызыт столицыште 11 миллион 514 тӱжем еҥ ила. Санкт-Петербургышто калык 4% шукемын. Российын кок столицыштыже пырляже чумыр калык гыч 11,4% еҥже ила.

Оласе калык ешаралтын, 73,7% шуын. Эн шуко еҥ Рӱдӧ федеральный округышто ила, тушто калык 1,2% шукемын, Йӱдвел Кавказ кундемыште 6,3% ешаралтын, моло вере шагалемын веле: Юл кундем да Сибирь округышто 4 %-лан, Йӱдвел-Касвел округышто 2,8%, Урал кундемыште 2,4%. Эн шагал калык кодын Мӱндыр Эрвелне, 8 ий жапыште тыште калык 6% иземын.

Тичмаш данный-влак 2013 ийыште пале лийыт.

Валерий Очеев

Добавить комментарий