У микрорайон-влакым чоҥаш тӱҥалыт

Республикыштына илыме верым чоҥымылан лишыл шушаш жапыште кугу тӱткыш ойыралташ тӱҥалеш. Чоҥышо-влак ончылно кугу задачым шындыме – ӱмаште 302300 квадрат метр илыме верым чоҥымо гын, тений 314 тӱжемым палемдыме. Тидыже 3500 пачер лиеш. 2015 ийлан 475 тӱжем квадрат метрыш шукташ палемдалтеш.

Йошкар-Олам вияҥдыме генеральный план дене келшышын, Козьмодемьянск тракт воктене Медведево посёлко ден Мышино ял велке илыме микрорайоным чоҥаш палемдыме. Мышино могырыш тӱрлӧ кӱкшытан пӧртлам нӧлташ шонат. Нуно 4 гыч 12 пачашан марте лийыт, коттедж семынат чоҥалтыт. Тыгак Шернур тракт дене Воин-интернационалист урем деч подсобный озанлык велыш у микрорайон лийшаш.

Валерий Очеев

Добавить комментарий