Йыван Кырла лÿмеш театр премийым кучыктымо

Марий Эл Республикын Культура, печать да национальность-влак паша шотышто министерствыжын ден Россий Театр пашаеҥ-влакын ушемыштын Марий региональный отделенийжын эртарыме «Йошкар-Ола театральный-2011» фестивальым иктешлыме да Йыван Кырла лÿмеш театр премийым кучыктымо.

Кок арня жапыште зритель-влаклан да жюрилан тÿрлö жанран латшым спектакльым ончаш темлыме. Российын сулло артисткыже, Марий Элын калык артисткыже Маргарита Медикова «Эн сай ÿдырамаш роль» номинацийыште В.Абукаев-Эмгакын «Кайыккомбо кашта» драмыж почеш шындыме тыгаяк лÿман спектакльыште Сайнайын рольжо дене сеҥышыш лектын.

Марий Элын сулло артистше Юрий Алексеевым В.Регеж-Гороховын «Кугезе муро» музыкальный драмыж почеш шындыме спектакльыште Арсутын рольжылан «Эн сай пöръеҥ роль» номинацийыште премий дене палемдыме.

«Кайыккомбо кашта» драмыште Валерийын рольжо дене Владимир Васильев «Кокымшо планан эн сай пöръеҥ роль» номинацийыште сеҥышыш лектын.

«Кугезе муро» драмыште Изÿдырын рольжылан Галина Иванова «Эн сай изи роль» номинацийыште премийым налын.

Павел Ефимовлан Марий кугыжаныш технический университетын преподавательже Сергей Лялин Ф.Г.Лоркан произведенийже почеш Г.Коснтантинов лÿмеш Академический руш драма театрын шындыме «Кровавая свадьба» спектакльыште Леонардын рольжылан  «Лялинын премийжым» кучыктен.

Чылаштымат ме шокшын саламлена да ончыкыжымат усталык шандалыштышт мастарлыкым эшеат шуараш тыланена.

shketan.ru

Добавить комментарий