Пÿрымаш тÿрлö лиеш

Тудын шочмо ялже — Тöҥгак. Евгений Тойгелдинович Айметов школ деч вара Шафран ял озанлык техникумышто ветфельдшерлан тунем лектын. Мÿндыр Эрвелыште армийыште служитлен. Мöҥгö пöртылмеке, тунемме пашажлан тÿҥалын. Икана кас модыш гыч пöртылмыж годым кушкедалт пытыше тувыран, вÿр вузык лийше аваже вашлийын. Ял гычак ик пöръеҥ аважым намыслаш тöчен улмаш.

Рвезе лектын куржын да тудым кÿзö дене шуралтен. Сусыргышо пöръеҥ икмыняр кече гыч эмлымверыште колен. Суд лийын. Ондак тиде осал пашам аффект состоянийыште ыштыме манын, Евгенийлан кок ийым пуэныт, но ик жап гыч уэш суд лийын, тудлан куд ийым ешареныт. Срокшо пытыме годым Юра йолташыже каҥашым пуымо гай ойлен: «Ялышкет пöртылын, пиалан от лий, витне. Аватын чапшым араленат гынат, умылыдымо еҥ-влак садиктак ÿмбакет шöрын ончаш тÿҥалыт. Белебей районышто мыйын шÿжарем уло, шкетын кок изи ньогам онча. Миен савырне. Келыштарет — кодат. Озанлыкат тушто поян».

Евгений ынде коло ныл ий лÿмлö Максим Горький лÿмеш озанлыкыште ила. Тыште ветфельдшерлан ыштен. Пытартыш кандаш ий вольык ончышо улеш. «Мыйым должность гыч шурен луктын огытыл. Пашадар шагаллан кöра шке кумыл дене лектынам. Ешем изи огыл, вет Дмитрий ден Валерий дек шкемын Изольда ден Станиславем ешаралтыныт. Икманаш, ныл икшыван ача улам. Эртыше ий-влак нимолан йöрдымö ыльыч гынат, юмылан тау, оксаде, шужен ышна шинче», — ойла.

Евгений вольык комплексыште тырша, вольык-влакым öрдыкта. Нунын нелытышт кече еда 650 грамм деч шагал огыл ешаралтеш. Пашадарже 9-10 тÿжем теҥгеш шуэш. Южгунам премийымат тÿлат. Чын, пашадарын пел ужашыжым гына окса дене пуат, молыжлан шурным, презым, сöснаигым да моло кÿлешым налаш лиеш. «Икмыняр гана Белебейыш ончыл пашаеҥ-влакын погынышкышт миенам. Пытартыш гана район вуйлатыше ныл тÿжем теҥге премийым кучыктен. Тиде пиал огыл мо?» — каласкала Евгений. Пелашыжат, Рита Николаевна, озанлыкыште эре ончыл доярка лийын. Икшыве-влакат веран верыште улыт.
Айметовмыт вольыкым шуко ашнат. «Мöҥгыштö сöснам ончаш йöратем. Нуно шинча ончылно оварен кушкыт», — ойла суртоза.

Тыге Мишкан районысо Тöҥгак марий пиалым Белебей районышто муын. Аважымат шкеж дек конден улмаш. Тудыжо, индешле кум ийым темымеке, ош тÿня дене чеверласен.

Пел ий ончыч озанлык вуйлатыше А. Мурзин сöрвалыме гай Евгенийлан уэш ветфельдшер пашажым умбакыже шуяш темлен. Пытартыш жапыште Рита Николаевнат шукерте огыл поселкышто чот шоҥгемше-влаклан почмо приютышто санитаркылан тыршен.

А. АСМАЕВ
Белебей район

Добавить комментарий