Театрын тӱнямбал кечыжлан Шкетан театр «Каче-влакым» темла

Шушаш рушарнян, 27 мартыште Театрын тӱнямбал кечыжым палемдат. Тиде кечын театр-влак эртак эн сай постановкым ончыкташ тыршат. Шкетан лӱмеш театр Арсий Волковын пьесыже почеш шындыме «Каче-влак» комедийым ончаш ӱжеш. Тӱҥ рольым артист-влак Алексей Тетерин ден Сергей Данилов модыт.

Валерий Очеев

Кумдан палыме марий драматург Арсий Волков «Каче-влак» комедийжым нылле ий чоло ондак возен. Тудын почеш спектакльым икымше гана  1967 ийыште шындыме.

Таче кечын театрыште тиде спектакльым ончышо еҥлан тунамсе жап, колхозышто соцтаҥасымаш эртыме йӧршынат оҥайла огыт чуч, туге гынат режиссёр Алексей Ямаев нылле ий ондаксе герой-влакын койыш-шоктышышт, пашам ыштымышт, куанышт да тургыжланымашышт гоч тачысе кечын сайже ден нелылыкшым почын, рашемден кертын.

Кок йолташ – Осяндр ден Тимошка – чон йодмыж да направлений почеш фельдшерлан пашам ышташ толшо самырык ӱдырым йӧратен шында. Кок йӧратыше чон коклаште кумшо уто, но кок йолташ коклаште шкешотан йӧратымаш таҥасымаш кая. Самырык ӱдырым шке велке сымыстарышашлан кок самырык еҥ тӱрлыжымат шонен луктеш… Варажым содыки рашемеш: Людмила шукертак марлан кайыше улмаш

Комедийыште шуко муро, мыскара йоҥгат.
Режиссёр-постановщик – А.Ямаев.
Художник-постановщик – Марий Элын сулло художникше Л.Тирацуян.
Семым Е.Сергеев келыштарен.

shketan.ru

Добавить комментарий