Икте-весылан эҥертен да пайдалын

Элысе экономикын кӱлешан отрасльже – чодыра озанлык – нерген мут лекмеке, тӱрлӧ регионышто тудын дене кылдалтше технический вуз-влакын вийыштым иктеш ушымаш ончыкыжо кӱлешаныш савырна. Таклан огыл Марий кугыжаныш технический университетыш Коми кундемысе Сыктывкар чодыра институт гыч толшо делегаций радамыште вузын веле огыл, тыгак тусо Промышленность да энергетика, Образований министерство-влакын представительышт лийыныт.

Уна-влак МарГТУ-н тунемме корпусшо ден лабораторийлаштыже, Ешартыш профессиональный образований институтыштыжо, университет комплексыш пурышо колледжлаште, Ботанический сад-институтышто лийыныт. «Кӱшыл тунемме заведений, тӱҥалтыш да кыдалаш специальный образований учреждений-влакын пашам сеть семын пырля ыштымышт» семинар-совещаний визитын рӱдӧ ужашышкыже савырнен.

Кажне вузын шке виян могыржо, погымо опытшо да ыштыме кылже улыт, сандене нунын дене ваш-ваш палдарыме уто ок лий, палемден МарГТУ-н ректоржо Евгений Романов. Мутлан, ӧрыктарыше ботанический садан, тунемме опытный чодыра озанлыкан да моло оҥай структуран марий университет вес вузын, тидын шотыштак Сыктывкар чодыра институтын, выпускникше-влакым магистр программа дене тунемаш (адакше тӱлыдыман бюджетный верлашке), тыгак аспирантурыш налаш ямде. Научный пашам шукташ МарГТУ-што биотехнологий негызеш экологически яндар энергокуатым ыштен налме шотышто Тӱшкан пайдаланыме рӱдер уло. Тудын у оборудований дене пойдарыме лабораторийлаштыже вес вузла гычат учёный, аспирант да магистрант-влак пашам ыштен кертыт.

А Сыктывкар чодыра институтын чын производство дене кылже пеҥгыде. Коми Республикын правительствыжын полышыжлан кӧра ты институт палыме предприятийла дене, тидын шотыштак Российысе ик эн кугу целлюлоз-кагаз комбинат дене, пашам пырля сайын ышта. Тугеже молан келшен илыше кок вузлан интегрироватлыме научно-производ­ственный кумдыкым ышташ огыл? Тек тушто пашам пырля ыштыше творческий коллектив-влак посна предприятийын заказше почеш шымлымашым шуктен шогат. Родо-тукым регионышто куатан чодыра промышленный предприятий-влак шукын улыт, сандене кок вузын студентше-влак производственный практикымат тушто пырля эртен кертыт ыле. А практика почеш диплом пашалан, вара ончыкылык диссертацийлан сай тема лектеш.

Коми Промышленность да энергетика министерствын Чодыра промышленный комплекс департаментшын тӱҥ специалистше Андрей Кривошеинын ойлымыж почеш, Сыктывкарыште регионысо биоэнергетикым вияҥдыме концепцийым ямдылаш тӱҥалыныт. Тудым илышыш пуртымашке МарГТУ-н учёныйжо ден магистрантше-влакымат ушаш ямде улыт. Нуно вара Коми кундемыш практикыш толыт. Научный шымлымаш пашаланат заказ уло – республика кумдыкышто пу отход кугытым рашемдаш да тудым перерабатыватлыме але утильыш колтымо технологийым ямдылаш.

А эше тений Коми велне чодыра пожар ваштареш рӱдерым почаш шонат, а тушто кӱкшӧ квалификациян специалист-влак кӱлыт. Мут толмашеш, тыгай рӱдер-влакым эл мучко почедаш тӱҥалыт. Тугеже МарГТУ-што келшыше магистр программым ямдылыме нерген шоналташ уто огыл.

Вашлиймашым иктешлыме шот дене кок вуз коклаште кугу ончыкылыкан партнёр кылым кучымо нерген договореш кидым пыштыме да тудым кызытак икте-весылан пайдале проектла дене пойдараш пижме.

Ю.Исаков

This article has 3 Comments

Добавить комментарий