Таҥемлан

Мутшо Самсон Кузьминын,
Семже Ион Кузьминын

Ош ломбер гыч колат шӱшпык йӱкым,
Шӱдыран кас каваш ончалат.
Ала йӧршын шыч вучо тый мыйым,
Ала уто улам мый тылат.

Ах, молан шӱмыш пыштышыч тулым,
«Йӧратем тыйым» маньыч молан?
Ок кӱл ыле ойган куку муро,
Лиеш ыле ласка шӱмемлан.

Тек мондет тые рвезылык касым,
От пыштал тек кидет вачышкем:
Мый шарнем эшеат тудо жапым,
Ончалметым лыжган шинчашкем.

Ош ломбер гыч колат шӱшпык йӱкым,
Шӱдыран кас каваш ончалат.
Шарналтет гын уэш рвезе жапым —
Ит мондал шарналташ мыйымат.

Добавить комментарий