Йылме-влакым кучылтмо нерген Положений

Марий Эл Республик кундемыште мер калыклан кӱлешан уверым савыктыме годым йылме-влакым кучылтмо нерген Положенийым пеҥгыдемдыме нерген
2010 ий 8-ше декабрьысе 329-ше №-ан

Марий Эл Республик Правительствын пунчалже

Марий Эл Республикын 1995 ий 26-шо октябрьысе 290-III №-ан «Марий Эл Республикыште йылме-влак нерген» Законжым илышыш шыҥдарашлан Марий Эл Республикын Правительствыже п у н ч а л е ш:

1. Марий Эл Республик кундемыште мер калыклан кӱлешан уверым савыктыме годым йылме-влакым кучылтмо нерген пырля пуымо Положенийым пеҥгыдемдаш.

2. Марий Эл Республикын муниципальный образований администраций-влакын вуйлатышыштлан мер калыклан кӱлешан уверым савыктыме йодыш-влакым виктарыше нормативный правовой акт-влакым вийыште улшо законодательстве да тиде пунчалын 1-ше пунктыштыжо ончыктымо Положений дене келыштараш темлаш.

3. Тиде пунчал шуктымым тергыме пашам Марий Эл Республик Правительствым вуйлатышын алмаштышыже, Марий Эл Республикын тӱвыра, печать да калык-влакын пашашт шотышто министрже М.З. Васютинлан ӱшанен пуаш.

Марий Эл Республик Правительствым вуйлатыше Л.Маркелов

Марий Эл Республик Правительствын 2010 ий 8-ше декабрьысе 329-ше №-ан пунчалже дене ПЕҤГЫДЕМДЫМЕ

Марий Эл Республик кундемыште мер калыклан кӱлешан уверым савыктыме годым йылме-влакым кучылтмо нерген
П О Л О Ж Е Н И Й

I. Чумыр положений-влак

1. Тиде Положений Россий Федерацийын 1991 ий 2-шо октябрьысе 1807-1-ше №-ан «Россий Федерацийысе калык-влакын йылмышт нерген» Законжо, 1992 ий 7-ше февральысе 2300-1-ше №-ан «Пайдаланыше-влакын праваштым аралыме нерген» Федеральный закон, 1997 ий 18-ше декабрьысе 152-ФЗ №-ан «Вер-шӧр лӱм-влак нерген» Федеральный закон, 2005 ий 1-ше июньысо 53-ФЗ №-ан «Россий Федерацийын кугыжаныш йылмыже нерген» Федеральный закон, 2006 ий 13-шо мартысе 38-ФЗ №-ан «Рекламе нерген» Федеральный закон дене келшышын да Марий Эл Республикын 1995 ий 26-шо октябрьысе 290-III №-ан «Марий Эл Республикыште йылме-влак нерген» Законжын 50-ше, 52-шо, 53-шо, 54-ше лончыжо-влакым илышыш шыҥдарашлан ямдылыме.

2. Мер калыклан кӱлешан увер – тиде мер калыклан пайдале раш палыдыме еҥ тӱшкалан ямдылыме увер, тидын шотыштак:
политике рекламе, тидын шотыштак сайлымаш деч ончычсо агитаций да референдумын йодышлаж дене агитаций;
рекламе шотан увертарымаш уке гын, кугыжаныш кучем орган-влакын, моло кугыжаныш органын уверышт, верысе шкевиктем орган-влакын уверышт, верысе шкевиктем орган-влакын структурышкышт пурыдымо муниципальный орган-влакын уверышт;
корно ден калык илыме верлаште корным ончыктышо увер, администраций-кундем образований ден вер-шӧр лӱм-влак (топонимий);
федеральный закон дене келшышын палдарыде але шарыде але пайдаланыше дек шуктыде кодаш лийдыме увер, тидын шотыштак ямдылыше (шуктышо, ужалыше), организацийын фирме лӱмжӧ (лӱмжӧ), организацийын верланымыж да паша жапше нерген увер, сату (паша, полыш) нерген нуным чын ойырен налаш йӧным ыштыше кӱлешан да чын увер;
вокзалласе, транспорт предприятийласе, калыкым тӱшкан обслуживатлыме моло вер ден предприятийласе расписаний да рекламе шотан огыл увер-влак (увертарымаш-влак);
калыклан лӱдыкшыдымылыкым ышташ да калыкым палдараш манын шарыме чоҥымо, ачалыме, корным ыштыме, аварий да моло тӱрлӧ пашам шуктымо нерген увер;
пайрем саламлымаш да сылнештарымаш.

3. Тиде Положенийын цельже дене уверым савыктыме йӧн-влакын тыгай тӱҥ умылымашышт кучылталтыт:
а) уверым тӱжвалне вераҥдыме йӧн-влак – уверым чылалан ончаш ужаш дене але тӱрыснек почын вераҥдыме йӧн-влак: плакат, щит, стенд, строительный сетке, электрон табло, табличке, сакымлӱм, растяжке, корно ончыктыш, пуэн овартыме шар, аэростат да кундемыште эрелан вераҥдыме моло техника йӧн;
б) калык коклашке уверым шарыме савыктыме йӧн-влак – калык коклашке уверым шарыме йӧн статусан да савыктен шарыме массовый коммуникаций йӧн-влак;
в) калык коклашке уверым шарыме электрон йӧн-влак – калык коклашке уверым шарыме йӧн статусан да уверым электрон канал дене шарыме массовый коммуникаций йӧн-влак;
г) уверым вераҥдыме тиражироватлыме йӧн-влак – калык коклашке уверым шарыме да уверым тӱжвалне вераҥдыме йӧн-влак радамыш пурыдымо, кеч-могай йӧным кучылтын, шуко чот дене ямдылыме йӧн-влак;
д) уверым эрык дене шарыме йӧн-влак – листовко, буклет, презентаций продукций, сату ате;
е) увер дене ойлен палдарымаш – калык коклашке уверым шарыме электрон йӧн-влакын каналышт дене пайдаланыде, йӱкым возымо да йӱкым кугемдыме ӱзгарым кучылтын але тудым кучылтде, уверым ойлен йоҥгалтарымаш.

4. Тиде Положенийын цельже дене тыгай йылме умылымаш-влак кучылталтыт:
а) Россий Федерацийын кугыжаныш йылмыже – руш йылме (2005 ий 1-ше июньысо 53-ФЗ №-ан «Россий Федерацийын кугыжаныш йылмыж нерген» Федеральный закон дене келшышын);
б) Марий Эл Республикын кугыжаныш йылмыже-влак – марий (курыкмарий, олыкмарий) да руш йылме-влак (Марий Эл Республикын Конституцийже дене келшышын);
в) моло йылме – вес йылме дене мутланыше да кундемыште илыше-влакын кугурак ужашышт лийше калык тӱшкан илыме кундемлаште Марий Эл Республикын законодательствыже дене Марий Эл Республикын 1995 ий 26-шо октябрьысе 290-III №-ан «Марий Эл Республикыште йылме-влак нерген» Законжын 27 лончыжо дене келшышын кугыжаныш кучем органлаште, организаций, предприятий да тӧнежлаште официальный кагазвиктышыште кучылташ палемдыме йылме-влак.

II. Мер калыклан кӱлешан уверым савыктыме годым йылме-влакым кучылтмо чумыр принцип-влак

5. Мер калыклан кӱлешан уверым савыктыме годым Марий Эл Республикын кугыжаныш йылмыже-влак да моло йылме литератур нормышт дене келшышын кучылталтыт.
6. Мер калыклан кӱлешан уверым савыктыме годым Марий Эл Республикын кугыжаныш йылмыже-влакым, моло йылмым ик жапыштак кучылтмо гын, Марий Эл Республикын кугыжаныш йылмыже-влак да моло йылме дене текст да йӱкан увер, Россий Федерацийын законодательствыже дене вес семын палемдыме огыл гын, содержаний, техника оформлений, увертарыме йӧн дене икгай, умылаш лийшын да сайын шуктымо лийшаш улыт.
7. Мер калыклан кӱлешан савыктыме уверым возымо але ончыктымо, а увер дене ойлен палдарыме годым йоҥгалтарыме текст-влак тӱрлӧ кугыжаныш йылме да моло йылме дене тӱрыснек икгай улыт гын, нуным кучылташ палемдыме моло йылмыш кусарыдеат савыкташ лиеш.

III. Мер калыклан кӱлешан уверым савыктыме годым йылме-влакым кучылтмаш

8. Марий Эл Республикын пӱтынь кундемыштыже мер калыклан кӱлешан увер Марий Эл Республикын марий (курыкмарий, олыкмарий) да руш кугыжаныш йылмыже-влак дене, а моло йылме кучылталтме кундемлаште тыгак нине йылме денат тыгай радам почеш савыкталтшаш:
а) уверым вераҥдыме тиражироватлыме йӧнлаште да уверым тӱжвалне вераҥдыме тиражироватлен ямдылыме йӧнлаште увер икгай кугыт дене пырля вераҥдалтеш, а уверым вераҥдыме кумдыкышто сӱрет материал да текст чот шуко годым уверым вераҥдаш ямдылыме йӧнын тиражше (чотшо) йылме-влак чот дене келшышын шеледалт кертеш;
б) уверым тӱжвалне вераҥдыме йӧнлаште, тидын шотыштак рекламе дене пырля федеральный закон дене келшышын палдарыде але шарыде але пайдаланыше дек шуктыде кодаш лийдыме мер калыклан кӱлешан уверым вераҥдаш кучылтмаште мер калыклан кӱлешан увер Марий Эл Республикын марий (курыкмарий, олыкмарий) да руш кугыжаныш йылмыже-влак дене, а моло йылме кучылталтме кундемлаште тыгак нине йылме денат дублироватлалтеш;
в) корно да калык илыме верлаште корным, администраций-кундем образований ден вер-шӧр лӱм-влакым (топонимийым) (корно ден моло ончыктыш семын) ончыкташ уверым тӱжвалне вераҥдыме у йӧным ямдылыме годым увер Россий Федерацийын законодательствыже дене палемдыме вер-шӧр лӱм-влакым да корно ден моло ончыктышым возымо шотышто йодмаш дене келшышын вераҥдалтеш;
г) тиде Положенийым пеҥгыдемдыме жаплан ыштыме корно ден калык илыме верлаште корным, администраций-кундем образований ден вер-шӧр лӱм-влакым (топонимийым) ончыктышо уверан, Марий Эл Республикын кугыжаныш йылмыже-влак кокла гыч иктыж дене але Россий Федерацийын кугыжаныш йылмыж дене возыман уверым тӱжвалне вераҥдыме йӧн-влак у дене вашталталтыт але Россий Федерацийын законодательствыже дене палемдыме вер-шӧр лӱм-влакым да корно ден моло ончыктышым возымо шотышто йодмаш дене келшышын Марий Эл Республикын кундемыштыже кучылталтшаш йылме-влак дене возыман уверым тӱжвалне вераҥдыме тыгаяк йӧн-влак дене (ончыктыш-влак) дене ешаралтыт;
д) увер дене ойлен палдарыме годым Марий Эл Республик кундемыште увер Марий Эл Республикын чыла кугыжаныш йылмыж дене дублироватлалтеш.

9. Мер калыклан кӱлешан уверым Марий Эл Республик кундемысе калык коклашке уверым шарыме электрон але савыктыме йӧнлаште вераҥдымаш калык коклашке уверым шарыме йӧным Россий Федерацийын «Калык коклашке уверым шарыме йӧн-влак нерген» Законжо дене келшышын возен кодымо годым ончыктымо йылме (йылме-влак) дене шукталтеш.

IV. Йылме-влакым кучылтмо шотышто йодмашым шуктымо радам

10. Мер калыклан кӱлешан уверым савыктымаште йылме-влакым кучылтмым тергыме пашам Марий Эл Республикын Правительствыже да Марий Эл Республик Правительствын пуымо полномочиян кугыжаныш орган-влак шуктат.

11. Кусарыме, кугыжаныш йылме-влак ден моло йылмым йылме нормо дене келшышын кучылтмо йодыш шотышто иктешлымашым ыштыме пашам Россий Федерацийын законодательствыже да Марий Эл Республикын законодательствыже кышкарыште пеҥгыдемдыме шкеныштын уставышт, положенийышт але Марий Эл Республик Правительствын пунчалже-влак дене келшышын полномочиян улшо Марий Эл Республикын кугыжаныш органже, тӧнежше-влак шуктат.

12. Мер калыклан кӱлешан уверым вераҥдыше организаций, тӧнеж, предприятий, посна еҥ-влак мер калыклан кӱлешан уверым вераҥдыме годым йылме-влакым кучылтмо шотышто йодмашым кӱлеш семын шуктымылан Россий Федерацийын законодательствыже дене келшышын административный мутым кучат.

Савыктыме: «Марийская правда. Официальный еженедельник.» 2010. 24 декабрь, 49.

Добавить комментарий