Кӱлеш полыш пуалтеш

Республиканский онкологический диспансерын радиологий отделенийжым кодшо курымын шымлуымшо ийлаштыжак чоҥымо. Кӧ тушто лийын гын, ужын:  зданий чот тоштемын. Черле-влакым эмлаш могай йӧн улмо нерген мом ойлаш? Диспансерлан чапле зданийым чоҥымеке, ты отделенийже тышакак кодын. Кызыт пӱтынь Россий мучко радиологий отделений-влакым уэмдыме, оборудований дене пойдарыме паша кая. Тидлан кажне ийын  изи огыл окса ойыралтеш. Чебоксарыште, мутлан, ончылий пристройым ыштеныт. Марий Элат  ты программыш логалын,  2012 ийыште  сай зданиян лийына манын шонаш амал уло.

Кызыт, тиде отделенийын ик ужашыжым пужен, уым чоҥаш тӱҥалме. Ончылно пеш кугу паша вуча гынат, вашке неле черан-влакым эмлаш йӧн ятыр пачаш саемеш манын шонымаш чоным ырыкта.

— Лучевой диагностикым эртараш, эмлаш эн у техника дене пойдарыме учреждений тиде лиеш, — ойла онкодиспансерын тӱҥ врачше В.Поляков. — Тыште кӱкшӧ частотан линейный ускорительым, гамма-терапевтический аппаратым да брахиотерапий аппаратым шындаш палемдыме. Тунам вара облучений аппаратым пуалме вер деке чот лишемдаш йӧн лектеш. Диагнос­тикым эртараш компьютер ден магнитно-резонанс томограф, эн у рентген, УЗИ  аппарат-шамыч вераҥдалтыт.  Чумыржо 700 миллион теҥгеаш оборудований шындалтшаш.

Вес ий кыдалне черле-влак у зданийыште эмлалташ тӱҥалыт манын ӱшанена. Вет республикын правительствыжат, президент Леонид Маркеловат тидлан кугу тӱткышым ойырат. Кызытшат черле-влаклан чыла кӱлеш полышым пуэна. Радиологий отделений тичмаш куатын пашам ышта. Таче кечылан улшо оборудованийым  пайдалын кучылтына. Отделенийыштына кугу опытан, келге шинчымашан медик-влак тыршат. Нуно тыште могай черле-влак эмлалтмым сайын умылат да, поро кумылым ончыктен, чон пуэн пашам ыштат.

Л.Иванова

Снимкылаште: врач З.Тарасова ден медсестра И.Кутузова черлым эмлаш пыштеныт; тошто зданийым пужен, уым чоҥаш тӱҥалыт

М.Скобелевын фотожо

Добавить комментарий