25 мартыште «Кум кечылан у кува» комедий

М.Шкетан лÿмеш Марий кугыжаныш драме театр 25 мартыште «Кум кечылан у кува» комедийым ончаш темла.

Спектакльын тӱҥ идейже курымашлык тема гыч лектын шога — ӱдырамашын вийжылан, куатшылан, мотрлыкшылан моктемуро. Но писатель чыла тидым путырак у, оҥай сюжет дене негызла. Йӱшӧ марий деч ватыже, ойырлем манын, аваж деке лектын кая. Метрийым пий семын йолыштен кода. Олаште илыше ученый, Метрийын тукым шольыжо, ялыш толеш, тудо ӱдырамаш сынан икымше роботым ыштен да пашаште тергынеже. Метрий робот ӱдырым марлан налаш шонен пышта, йӱла почеш карт кугыза «лословеньымат» налеш. Ял илыш тургымышто Метрий ден робот-вате коклаште шуко оҥай томаша лиеш. Но мучашлан «кӱртньӧ вате» ӱдырамашын чытымыж гыч пычырикшымат ыштен шуктыде, йӱлен кая. Метрийын шке ватыже, Ониса, пӧртылеш. Нуно угыч икте-весыштым умылен, йӧратен илаш тӱҥалыт.
Спектакль шуко муро дене сӧрастаралтын. Семым композитор Сергей Маков возен. Муро текстым – поэт Вячеслав Абукаев-Эмгак. Пьесымат, чылт марий илышлан келыштарен, В.Абукаев-Эмгакак кусарен.

shketan.ru

Добавить комментарий