Тодылалтше кумыл

Мутшо В.Изилянован
Семже В.Захаровын

Шонышо мый лийым,
Вучышо мый лийым.
Корнывожыш лектын,
Тыйым кӧ вашлийын?
Олыкна пеледе,
Толкыналтын кийыш,
Шӱлыкем леведын,
Саламетше мийыш.

Солышо мый лийым,
Погышо мый лийым.
Мут орлаҥге пуйто
Пуыш кӧргӧ вийым.
Кас мардеж тарватыш
Водын нӧлпӧ укшым.
Эртыме кышатым
Таче пургыж ӱштын.

Ала эҥыж кӱмым,
Ала снеге кӱмым
Шарныктен, ош лумыш
Возеш йошкар ӱмыл.
Тодылалтше кумыл
Курымешлан огыл —
Шочмо мланде кӱдынь
Иктат шкетын огыл.

Тодылалтше кумыл (mp3)

Добавить комментарий