Кушто шӧрым эн шуко погат?

Тений 1 январьлан республикыште тӱкан шолдыра вольык 107800 вуй шотлалтын. Тидыже идалык ончычсо деч 95% веле. Тыгодым кажне 100 ушкал гыч 47 вуйжо посна еҥ-влакын суртпечыштышт шогат. Кузерак уто шӧрым погымо паша вияҥеш?

Ял озанлык министерствын увертарымыж почеш, тений кок тылзат пелыште ял калык деч чумыржо 1283 тонн шӧрым погымо, ӱмаште 23 мартлан улыжат 800 тонн лийын. Шӧрым погаш предприниматель-влак 137 верым ыштеныт, райпо 27 пунктым почын. Тылеч посна яллаште потребительский кооперативым ышташ тӱҥалыныт, тыгайже 189 уло. Шӧрым эн шуко погат Морко, Параньга, Шернур да Марий Турек районлаште. Паша деч посна кодшо-влакат кугыжаныш полыш дене шукынжо вольыкым ончаш тӱҥалнешт.

Валерий Очеев

Добавить комментарий