Вольык урлыкым саемдымылан – тӱткышым

Кадрым уэш ямдылыме да агробизнес Марий институтышто  республикысе ял озанлык предприятийлаште тыршыше шӱдӧ утла ветврач шинчымашыжым пойдарен.

Семинарлаште вольык чер дене кылдалтше йодышлам ончен лектыныт. Российысе вӱдышӧ ветеринар академий-влакын профессорышт сӧснам орландарыше африкан чума ваштареш кучедалме у йӧн-влак дене палдареныт.

Семинарын пытартыш кечынже  ветеринар-влак дене Марий Эл Республикын правительствыжым вуйлатышын икымше алмаштышыже, ял озанлык да продовольствий министр А.Егошин дене вашлийыныт. Тудын ойлымыж почеш,  тенийсе кок тылзым иктешлымек рашемын:  вольык озанлык вияҥме шот дене  Марий Эл Юл кундем федеральный округышто нылымше верыш лектын. Тыштыже ветеринар врач-влакын надырыштым палемдыде огеш лий. Нуно, чер вияҥ кертмым пален, ончылгоч мерым ыштеныт, игечым ончен, вольыклан мом пукшышашым рашемденыт.

Ӱмашсе кукшо кеҥеж ончыктен: ме пӱртӱс туткар ваштареш шогаш ямде огынал. Чын, тений  корма чӱдӧ. Туге гынат тиде Параньга районышто  гай  вольыкым шыллан колташ амалым   огеш пу. Тушто кок тылзыште 57 ушкалым шыл комбинатыш колтеныт.  Тений республикыште  кугурак кумдык мландым курал ӱдаш палемдалтеш. Мутлан, кукуруз ден рапсым ятырлан шуко ӱдымӧ лиеш. Урлыкаш уло. Эн тӱҥжӧ – шошым  тиде пашам жапыштыже, 10  кечыште, эртарен колтыман. Уке гын лектышыже палемдыме наре огеш лий.

— Лишыл ийлаште ик ушкал деч 5000 литр шӧрым шупшылмашке лишемына. Тиде задачым шукташ лиеш. А умбакыже я верыште тошкышташ, я уло вийым пыштен ышташ тӱҥалына, — ойлен республикысе ветеринар-влак ончылно А.Егошин. – А тыште  тӱткышым тӱҥ шотышто вольык урлыкым саемдымылан ыштыман. Мут толмашеш, кодшо ийлаште   сурткайык шылым ыштымаште республика ончыко кугу ошкылым ыштен. Ӱмаште сӧсна шылым 22 да сурткайык шылым 30  процентлан шукырак ыштен налме.

Д.Речкин

Авторын фотожо

Добавить комментарий