Илышым арален кодаш

Чер ден черат икгай огытыл. Иктыштым уто тургыжланымаш, кугу роскот деч посна куштылгынрак сеҥаш лиеш гын, весышт шотышто шагал огыл азапланаш логалеш. Теве нине радамышкак  неле, тыгак шуэн вашлиялтше чер-влак пурат. Тыгай черле-влаклан кугыжанышын полышыж деч посна нигузеат огеш лий, вет шукыж годым тудо илышым арален кодаш полша.

Росздравнадзорын Марий Элысе управленийже пеленсе Пациент-влакын праваштым аралыме шотышто общественный советын (тудым Марий Эл Кугыжаныш Погын председательын икымше алмаштышыже, «Единый Россий» фракцийым вуйлатыше В.Мухин вуйлата) эртарыме «йыргешке ӱстел йыр» мутланымаш республикыште льготник-влаклан  шерге эмым ситарыме йодышлан пӧлеклалтын ыле. Мемнан дене ты шотышто  сӱрет могайрак? Эн кӱлешан эм-влакым чыла льготник жапыштыже да тӱрыс налын шога мо? Ойлышо-влак нине да моло йодыш-влаклан вашмутым пуаш тыршеныт.

— Ме тидым эреак терген-эскерен шогена, — палемден управленийын  здравоохранений да социальный вияҥмаш сферыште кугыжаныш контроль да надзор отделжым вуйлатыше М.Орлова. — Эм шапаш улмым арня, тылзе еда эскерен шогена, аптека ден эмлыме учреждений-шамычым тергена. Республикыште шуэн вашлиялтше черан 158 льготник уло. Кодшо ийын нунылан 1162 рецептым возымо. Рецептын кокла акше 55 тӱжем наре теҥгешке шуын.

Мутат уке, чылаштын йодмыштым тӱрыс шуктымо манаш огеш лий. Санденак вуйшиймаш-влакат пуреныт.  Управлений нуным терген, тышеч кумшо наре ужашыже чыныш лектын.

Онкологий черан-влаклан эмым ситарыме шотышто йодыш пӱсынрак шога. Эмым налаш ойырымо окса гыч пеш кугу ужашыже тыгак сакыр диабетан еҥ-влаклан кая. Вет шукышт  инсулин, моло препарат деч посна ик кечымат илен огыт керт.

Федеральный ден региональный программа-влакын кузе шукталт толмышт нерген Эмым ситарыме шотышто управленийым вуйлатыше Т.Королёва каласкален. Кодшо ийын республикыште 21 тӱжем еҥ эмым яра налын кертын. 161 миллион теҥгеаш  229 тӱжем рецептым возымо. Теният ты система ышта, манын тудо. Медикаментым республикыш колтен шогаш конкурсым, аукционым эртарыме, сандене кугу нелылык лийшаш огыл.

Мутланымаш кужун да пайдалын эртен. Вет тышке медицина учрежденийым вуйлатыше-влак гына огыл, тыгак республикысе инвалид  организаций-влакын еҥыштат толыныт. Ик шонымашке шуыныт: республикыште льготник-влаклан эмым ситарыме паша начарын огыл кая гынат, эшеат саемдаш лиеш. Федеральный льготник-влаклан рецепт почеш колтымо препарат-влакын спискыштым кумдаҥдыме шотышто ой дене федеральный службыш лекташ мутланен келшеныт. Аптекылаште тиде але вес эм улмым пален налаш манын, здравоохранений министерство единый информационный рӱдерым почшаш. Вет кызыт эмлыме учреждений-влак кушто могай эм улмо нерген чылаж годымак огытат пале.

«Йыргешке ӱстел йыр» мутланымашке Росздравнадзор пеленсе Пациент-влакын праваштым аралыме шотышто общественный советын секретарьже В.Шухат толын. Тылеч ончыч тудо кок регионышто лийын, туштат тиде йодышымак каҥашеныт. Пошкудо-влакын сай опытышт дене палыме лийын, республикыште шуктен шогымо поро тӱҥалтышым кучылтын, лекше нелылыкым чактараш лиеш, палемден Москва гыч толшо уна. А тыште мутланымым, темлымаш, ой-каҥаш-влакым вуйлатыше-влак деке шукташ сӧрен.

Л.Иванова

Добавить комментарий