Шочмо вер деч шерге мо уло, ала?

18 мартыште Йошкар-Олаште, Т.Е.Евсеев лӱмеш национальный тоштерыште, Куженер районлан пӧлеклалтше мероприятий эртаралте.

Тушко районысо администрацийын, «Йошкар-Олаште Куженер районын землячествыже» мер организацийын еҥже-влак, тыгак шымлызе, культура пашаеҥ да ятыр моло лӱмлӧ еҥ-влак чумыргеныт ыле.

Погынышо-влакым эн ончычак Марий Эл Республикын Кугыжаныш Погын председательжын алмаштышыже А.Н.Иванов саламлыш да Куженер район муниципальный образованийын главаже В.В.Уразаевлан Чап грамотым, Йывансола культура пӧрт пелен чумырымо «Мурсескем» фольклор ансамбльын вуйлатышыже Е.А.Каменщиковлан Тауштыман серышым кучыктыш. Тылеч вара тоштер вуйлатыше А.В.Муравьёв, район вуйлатыше В.В.Уразаев, тудын социальный йодыш дене алмаштышыже Н.Ф.Сергеева шочмо районна, ойыртемалтше да моткочак сылне вер-шӧрна-влак нерген каласкалышт, тудын кызытсе илышыж дене палдарышт. Лӱмлӧ, районым веле огыл, тыршен ыштыме пашашт дене пӱтынь республикым чапландарыше еҥна-влак нерген ушештарен кодымо годым нунын фотографийыштым кугу экраныште ончыктышт. Кызыт В.М.Регеж-Гороховым, И.Г.Ивановым, А.Я.Антипиным, В.А.Лоскутовым да молымат Марий Элыште кӧ огеш пале?! Сандене нунын коклаште лияш кугу пиал ыле.

Погынышо-влак кокла гыч ятырын илыш-корнышт, шуктымо пашашт нерген каласкалаш кумылаҥыч, икте-весыштлан йодышымат пуэдышт. Тыгодымак моктымо мут деч посна икмыняр ӧпке шомакат йоҥгалте. Ончыкыжым район администрацийын пашаеҥже-влак тидым шотыш налыт да ситыдымашым кораҥдат манын, чыланнанат ӱшаныме шуэш. Южышт шкешт нерген каласкалыме деч посна творчествышт денат палымым ыштышт. Мутлан, В.М.Регеж-Горохов почеламут корнылажым лудо. «Мурсескем» ансамбльын кум участникше сылне номер дене чумыргышо-влакын кумылыштым нӧлтальыч, чоныш пайрем шӱлышымак пуртышт.

Икманаш, тыгай погынымаш моткоч пайдале. Чумыргышо-влак кокла гыч тидым кажныже пеҥгыдемден ойлыш. Пытартышлан чылаштлан шукерте огыл гына лукмо, Куженер районлан пӧлеклалтше «Они ковали победу» да ты районынак депутатше-влак нерген книга-влакым пӧлеклышт.

Л.Камалетдинова

Снимкылаште: А.Я.Антипин,  И.А.Сте­панова, В.А.Лоскутов, В.А.Иванов шочмо кундем нерген мутланат; А.Н.Иванов Е.А.Каменщиковлан Тауштыман серышым кучыкта

Д.Речкинын фотожо

Добавить комментарий