Пӧртылыт манын ӱшанат

Медицина отрасльыште кадр йодыш эреак пӱсын шога. Тачысе кечылан республикыште 52 специальность дене 306 врач огеш сите. Кеч-могай поликлиникыш миет гынат, тиде але вес специалист уке улмым пален налат. Шуко вереже ик эмлымвер гыч вес эмлымверыш совместитель семын ӱжмӧ врач-влак пашам ыштат. Эн чотшо участковый терапевт, педиатр, “Вашке полышын” врачше, акушер-гинеколог, кардиолог, офтальмолог, анестизиолог-реаниматолог, инфекционист, рентгенолог, психиатр-нарколог-влак кӱлыт.

Терапевт, педиатр-влаклан пашадарым кӱзыктеныт гынат, участкыште пашам ышташ кумылан-влак шукынжак огытыл. Тидыже нунын пашашт пеш ответственный улмо дене кылдалтын. Вет моло специалист-влак деке черле-влак тӱҥ шотышто нунын гоч логалыт.

— Кадр проблема, чынжымак, тургыжландарыде огеш керт, — ойла Йошкар-Оласе 2-шо номеран поликлиникын тӱҥ врачше В.Кузнецов. — Мемнан денат офтальмолог, проктолог, кардиолог кӱлыт. Тений поликлиникышкына, интернатурым тунем пытарымеке, тӱрлӧ специальностян лу врач толшаш. Нунын коклаште кок офтальмолог, уролог, невролог, гинеколог, терапевт  улыт.

Тений медвузлам тунемын лекше-влак дене, мутат уке, проблема тӱрыснек огеш решатлалт.  Икмынярышт  шочмо кундемышкышт пӧртылаш тореш улмышт нерген ойленыт. Тидым нуно изи пашадар да илаш вер уке дене умылтарат. А такше пытартыш ийлам налаш гын, целевик-шамыч утларак пӧртылаш тӱҥалыныт. Мутлан, 2004 ийыште тунемаш кайыше-влак кокла гыч пелыже шочмо кундемышкыже толын, 2007 ийыште – 70 процент, 2009 ийыште — 80 процент. А тений мынярын пӧртылыт – кеҥеж тӱҥалтышлан пале лиеш. Такше шонымашышт огеш вашталт гын, медвузым пытарыше лу ӱдыр-рвезе Медведево, кандашын Волжский, кудытын Звенигово, визытын Параньга, кумытын Морко да Советский районлаште пашам ышташ тӱҥалаш кумылан улыт.

— Ме студент-целевик-влаклан кокымшо ий кажне тылзын тӱжем теҥге дене тӱлена, сандене, нуно мемнан деке пӧртылыт манын, моткоч ӱшанена, — ойла Параньга  рӱдӧ райбольницын тӱҥ врачшын алмаштышыже Н.Ахмадуллина.

Выпускник-влакын вуз дене чеверласымышт марте жап  шукак огеш код. Ончалына: мыняр еҥ республикысе врач-влак радамым ешарат. Мутат уке, пӧртылшӧ-влак кокла гычшат шукышт олаште лакемаш шонат. Но вет районыштыжат чолга, келге шинчымашан самырык врач-влакым вучат.

Людмила ИВАНОВА

Д.Речкинын фотожо

Добавить комментарий