«А мый ӱшанем…»

Февраль мучашыште Ленин лӱмеш тӱвыра полатыште артистка да мурызо Л.Купсольцеван концертше эртен. Ала-кӧжӧ тыгай марий концерт кажне кечын лиеш манын ойлен кертеш. А мый нунылан каласынем: уке, тыгай концерт кажне кечын ок лий. Ме Люба Купсольцеван концертшым моноспектакль семын ончышна.

Мурызо концерт программым пӱрымаш дене мутланыме семын чоҥен. Ӱдырамаш ден пӧръеҥ кокласе янда гае кылым, икшыве, лишыл еҥ верч тургыжланыме кумылым сценарийым возышо Н.Пушкина почаш полшен, тудак Пӱрымашын рольжым модын. Муро коклаште ни уто мут, ни уто койыш, ни уто ошкыл ыш кой. Адакшым, ончычсо концертше дене таҥастараш гын, мурызо тошто муро аршаш гыч лачак «Кӱдыроҥгыр» мурым гына арален коден.

Тиде концертым ик шӱлыш дене эртарен колташ артисткылан йолташыже-влак Н.Пушкина, И.Актуганов, С.Мамаев, С.Яндукова, родо-тукымжо полшеныт. Любан шольыжат, А.Купсольцев, муро дене лектын. А Павел эргыже «Кунам канет, авай?» мурым муралтыш гын, калык тынар тӱткын колышто! Рвезын Йошкар-Оласе интернат-школышто тунеммыже раш шижалте: чаткан-чаткан сем савыртышым савыралеш. Залышке ик ганат ыш ончал, туге гынат мурымыжо мыланна моткоч келшыш.

Илышна тӱрлӧ пагыт гыч шога. Эше эртыше идалык мучаште Люба Купсольцева Санкт-Петербургыш илаш кайыме нерген ойлыш гын, ынде угыч Йошкар-Олаште пашам ышта. «Ме, тудын ару чонжым палыше, муро кумылжым йӧратыше йолташыже-влак, моткочак ӱшанена: «А мый ӱшанем» концерт Любан илышыштыже у йыжыҥым почеш,»  — каласен муро пайрем нерген драматург Г.Гордеев.

З.Дудина

Снимкыште: ты кечын Любовь Купсольцева шкеж нерген огыл, эргыж верч утларак тургыжланен

И.Речкинын фотожо

Добавить комментарий