Ечыгорнышто – туныктышо-влак

Морко районышто туныктышо-влак коклаште кажне ийын спортын тӱрлӧ видше дене спартакиада эртаралтеш. Сентябрьыште шыже кросс дене почылтеш. Ноябрь тӱҥалтыште валейбол, тылзе мучаште ӱстембал теннис, январьыште шахмат дене модыт. Кодшо кечылаште Янситово школын ечыгорныштыжо писылыкыштым ончыктеныт. Март мучаште винтовка дене лӱйкалымаште таҥасаш тӱҥалыт.

Таҥасымашлан тӱҥалтышым районысо туныктышо-влакын профсоюз организацийыштым вуйлатыше В.Чурилина коло ий ончыч ыштен да тудым районысо ДЮСШ дене пырля кажне ийын эртарат. Туныктышо-влак уло кумылын тушко ушнат.

Тичмаш общеобразовательный школ (командыште — вич еҥ) ден тӱҥ школ (командыште кум еҥ) шке коклаштышт таҥасеныт. Икымше тӱшкаште Арын, Шеҥше, Морко посёлкысо кудымшо номеран, кокымшо тӱшкаште Кожлаер, Купсола, Эҥерсола школ-влакын командышт ончылно лийыныт. Личный зачётышто шке ийготан-влак коклаште абсолютный сеҥыше семын В.Романовым (Арын школ), Э.Петровым (Моркысо кокымшо номеран школ), В.Андреевым (Купсола школ), Л.Михайлова ден А.Ивановам (Кожлаер школ), Е.Некрасовам (Кокласола лицей) палемденыт.   Икымше тӱшкаште Арын, Зеленогорский, Шеҥше, кокымшышто Кожлаер, Азъял, Купсола школ-влакын командышт  сеҥышыш лектыныт.

Ончыкыжо винтовка дене лӱйкален ӱчашымеке, спартакиадыште сеҥыше команда рашемеш. Тудлан районысо профсоюз организаций  туныктышо-влакын августысо конференцийыштышт спорт ӱзгарым налаш оксам пуа.

А.ТИТОВ

Снимкыште: Л.Михайлова (Кожлаер школ) ден Е.Некрасова (Кокласола лицей)

Авторын фотожо

Добавить комментарий