Ӱярня Немда-Обалыш ялыште

Йошкар Оласе Марий тÿвыра рÿдер ий гыч ийыш марий йÿла пайрем-влакым эртарен шога. Теният 6 мартыште У Торъял район Немда-Обалыш ялыште республике кÿкшытыштö марий ÿярня пайрем эртыш. Пайремышке ятыр районла гыч марий калык погынен.

У Торъял район администрацийын вуйлатышыже В.В. Блинов, РФ Кугыжаныш Думын депутатше, Марий Мер каҥаш вуйлатыше Л.Н. Яковлева, Марий Эл Республикысе тÿвыра печать да калык-влакын пашашт шотышто министрын алмаштышыже Г.С. Ширяева, Йошкар-Оласе У Торъял землячествын вуйлатышыже В.А. Наумов, Марий Эл Республикын тÿҥ онаеҥже А.И. Таныгин марий калыкым Ӱярня пайрем дене шокшын саламленыт.

nemda_1_0_0.jpgМарий калык йÿлалан поян. Теве «первый йÿмашым» У Торъял район Большенурминский тÿвыра пöртын «Шонанпыл» фольклор ансамбльже шарныктарен. «Ӱдыр тулартымаш» йÿлам мурышо да куштышо «Ал ÿжара» фольклор ансамбль ончыктыш. «Азалан лÿмым пуэна» Лумарий фольклор ансамбль пеш оҥайын модыч. «Мÿндыр родым вашлийына» йÿламат Немда тÿвыра пöртын «Эрвий» фольклор ансамбльже порсын кумылым ончыктен мÿндыр унам вашлийыч. «Кинде авызлымаш» йÿлам Кузнеч тÿвыра пöртын «Келшымаш» фольклор ансамбльже мастарын модын ончыктышт. Тылеч посна Куженер район «Ший аршаш», Советский поселкын «Кугезе кумыл», Марий тÿвыра рÿдерын «Чон оҥгыр» да Оршанке районын «Какшан сем» фольклор ансамбльышт-влак мурен-куштымашышт ден калык чоным вÿчкышт. Тыгак И.С. Палантай лÿмеш тÿвыра да сымыктыш колледжын студентше-влак куштымаш мастарлыкым ончыктышт.

nemda_1_0_0.jpgӰярня шке модышыжымат шарныктараш таратыш. Ӱярня курык гыч мунчалтымаш, «Карта панга дене модмаш», тÿрлö танасымашышке лач икшыве гына огыл, ÿдырамашыжат, пöръеҥжат талын ушнышт. Сонар ече дене пöръеҥ-влакын ÿчашымашышт моткочак оҥайын койын.

Икманаш, кöн чонжо мом йодын: ансамбль-влакын мастарлыкыштым ончалаш, а икмынярыштын модаш-веселитлаш – чыла тидым Обалыш ялыште тÿр гоч ышташ лийын.

Обалыш тÿвыра пöртышто Марий кас моткочак веселан эртыш. Куштен-мурен пытарымек калык погынен Ӱярня кувам йулалташ лекте да ийыште погынышо лавырам да осалым йÿлалтен поктен колтыш. А вара родо-тукымжо дене пырля ял мучко унала кошташ кайыш.

Теве тыге марий калык ик эн йöратыме да вучымо пайремжым эртарыш.

Марий тÿвыра рÿдер

Добавить комментарий