Йошкар-Олаште корным олмыктат

«Марий Эл» ий полат воктене Карл Маркс уремым кодшо арняштак «тумышташ» тӱҥалыныт. Икмыняр уремыш дорожник-влак вишкыде асфальт вартышым шараш тӧченыт. Асфальтым пыштыше икымше машинам кодшо кугарнянак Хасанов уремыште ужаш лийын. Карл Маркс гыч Советский урем марте корно кумдыкыш асфальтым кок пачаш шареныт. Кызыт тушто люкым вераҥдат. А Карл Маркс уремыште лакыла воктенсе асфальтым фреза дене чаткан пӱчкын налыныт. 
Панфилов урем. «Ола» МУП-ын пашаеҥже-влак лакылаш свежа асфальт вартышым пыштат. Каласыман, Йошкар-Оласе корнылам районласе корным олмыктышо организаций-шамычат тӧрлаш полшат. Советский уремыште лакылам петырымаште «Марий Эл Дорстрой» предприятийын Волжский филиалжын пашаеҥже-шамыч тыршат. Нунын деч посна Звенигово, Медведево районласе корным ачалыше организаций-влакын спецтехникыштымат рӱдоласе корнылаште ужаш лиеш.
Республикын Госзакупко сайтышкыже «Ола» МУП Йошкар-Оласе машина корнылам олмыктымо шотышто электрон торгиш ныл йодмашым пуэныт. Марий Элын бюджетше гыч ты пашалан 27.287.569 теҥгем ойырат.
Первомайский уремым, Панфилов гыч Серов урем марте, Комсомольский уремым, Ленин проспект гыч Серов урем марте, Советский уремым, Красноармейский гыч Яналов урем марте, Шернур трактым, Эшкинин урем гыч ола тӱр марте, Машиностроитель уремым, Зарубин гыч Красноармейский урем марте, ачалаш тӱҥалыт. Тидлан 20.047.520 теҥгем ойырат.
Водопроводный уремысе корным тӧрлымылан (Комсомольский гыч Первомайский уремла марте) 1.098. 532 теҥге кайышаш. Чехов уремысе корным (Осипенко гыч Я.Эшпай урем марте), Кремлевский уремысе корным (Первомайский гыч Советский урем марте) ачалымылан 2. 436.777 теҥгем кучылтшаш улыт. Карл Маркс уремысе корныш (Строитель урем гыч Ленин проспект марте) асфальтым пыштыме 3 .704.740 теҥгеш шуэш.

Йошкар-Олаште мут коштеш: рӱдолаште Общероссийский калык фронтын апрельыште эртаралтшаш форумышкыжо Россий президент В.Путин толшаш.

Налмывер: «Марий Эл» газет

Добавить комментарий