Валерий Тумбаевын авторский у фотоальбомжо-влак

2015 ий 18 кылмыште С.Г. Чавайн лўмеш калыкле книгагудын фондшо у ойыртемалтше кок савыш ден пойдаралтын: Валерий Тумбаевын «Богема провинции» серий гыч «Художник Иван Ямбердов» да «360 градусов. Галерея Ивана Ямбердова. Продолжение» у авторский фотоальбомжо-влак.

Валерий Васильевич Тумбаев, фотограф, Российсе фотохудожник-влак Ушемын членже, Российсе театрал пашаеҥ-влак Ушемын членже да тыгак Калыкле книгагудын шукертсе да ӱшанле йолташыже. Мемнан книгагудышто тиде мастар фотосӱретчын икмыняр выставкыже, книга да альбом презентаций ден творческий вашлиймаш-влак эртеныт. Шке 55 ияш лӱмгечыжымат Валерий Тумбаев 2011 ий шыжаште мемнан денак, Калыкле книгагудышто — тӱшка калык ончылно, «Избранные фотографии» — у фотоальбом палдарымаш ден эртарен.

Новые авторские фотоальбомы Валерия ТумбаеваВалерий Тумбаев Калыкле книгагудышто кок идалыклан ик гана эртарыме «Марий Элын идалыкысе книгаже» Республикысе конкурсын участникше. Кажне гана эртарыме конкурсыш темлыме книгаже-влак лудшо коклаште пеш кугу интересым шочыктат да профессионал жюри член-влакат кӱкшын аклат.

Тыге, 2008 ийыште лекше «Богема провинции» фотоальбомжо «Открытая книга» номинацийыште сеҥыше лийын, а 2014 ийыште «Режиссер Василий Пектеев» да «360 градусов. Галерея Ивана Ямбердова» книгаже-влак («Богема провинции» серий гыч) «Лучшая книга о замечательных людях края» номинацийыште сеҥеныт. Профессионал жюри член-влакын аклымашышт ден мемнан лудшо-влакат келшат. Лудшо-влакын йӱклымышт почеш Валерий Тумбаевын альбомышт рейтингын кӱшыл корнылажым налын шогат.

Валерий Тумбаев раш пала, книгагудо – тиде тыгай вер, кушто Книга ден Лудшо садиктак вашлийыт. Тудо кажне лектышыжым книгагудыланак пӧлеклаш тырша да шке кидпалыжым чон гыч лекше тыланымаш ден сӧрастара. Каласаш кӱлеш, авторын кидпалыжым пыштыман книга мыланна поснак шергакан. Тудо «Э» литера ден палемдалтеш да книгагудын погыкым аралымаш верыште ойыртемалт шога. Тиде кечылаште пӧлеклыме кок у фотоальбом марий художник Иван Ямбердовын сылне паша саскаж ден палдарыше улыт, «Богема провинции» проектым умбакыже шуят.

Валерий Тумбаевын чыла фотоальбомжо-влак (тачысе кечылан — кандаше) Чавайн лӱмеш калыкле книгагудын Калыкле да кундем ден кылдалтше да Сымыктыш литератур ден пӧлкан шӧрлыклаштыже аралалтыт.

С.Г. Чавайн лӱмеш калыкле книгагудо

Добавить комментарий