Марий тӱвыра тылзе тӱҥалын

Нефтекамскыште Калык тӱвыра куд рӱдер гыч кажныже идалык мучко шкенжын йылме да тӱвыра тылзыжым эртара.
Куснылшо кубок кодшо арнян башкир-влак деч марий тӱвыра рӱдерыш пӧртыльӧ — ноябрь тылзе олаште адакат марий йылме, йӱла, литератур дене кылдалтше мероприятий-влаклан поян лиеш. Школлаште, библиотекылаште, мер ушемыште марий литературын классикше-влаклан, йыргешке лӱмгечыштлан пӧлеклыме лудмаш, конкурс, викторина, выставка, экскурсий да тулеч моло сомыл кумдан эртаралтыт. Кугурак-влаклан манына гынат, «Марий касыш» самырыкшат, 70-80 ияш-влакат уло кумылын погынат, чон лушкымеш мурен-куштен каналтат. Но эн вучымо, йӧратыме пайрем – марий тылзым мучашлыме кугу концерт.  Тений тудо 4 декабрьыште Оласе тӱвыра рӱдерыште эрта. «Э-эх, шокталте, шокталте!» концертыште молгунамсылак артист-влак дене пырля залыште, а вара фойеште пӱжвӱд йоктарен марла кушташ йӧратыше-влак тылзе тӱҥалтыштак, билетым ончылгоч налаш шонен, редакцийыш йыҥгырташ тӱҥальыч (Очыни, ончычсо ийлаште тыгай пайремыш билетым налде кодыныт).
Тӱрлӧ кундемласе гармоньчо, калык инструмент дене шоктышо-влак концертыште мастарлыкым ончыкташ йодмашым колтылаш тӱҥалыныт, эн мотор марий вургем конкурсышто сеҥыше-влаклан шергакан пӧлекым кучыкташ спонсор-влакат шке кумылын ушнаш шонат. Икманаш, Нефтекамскысе марий тӱвыра пайрем шукертак кугу фестивальыш савырнен. Тыште фольклор, мурышо-куштышо коллектив-влак, монден пытарыме семӱзгар дене шоктышат, ончыч ВИА (вокально-инструментальный) манме ансамблят, посна мурызо, баян, гармонь, тальянка, саксофон дене шоктышат лийыт. Конешне, тыгай касыште «Чолманлан» возалтше-влаклан шергакан пӧлекым кучыктымаш шукертак поро йӱлаш пурен. Сюрприз деч поснат ок лий. Концертыш ик шагат наре ончычрак толшо-влаклан тудо фойеште тӱҥалеш. Икымше «оҥайже» — молгунамсылак пытартыш кечылан кассыште билет ок код (южгунам арня ончычак пыта), вес могырым, тудым ончылгоч налын шуктышыжо кумылым нӧлтышӧ моло сюрпризым вашлиеш. Тыге, усталык идалыкым мучашлыме кугу пайрем дене У ийым вашлияш ямдылалтме корным почына. Билетым налме, заказым ыштыме да моло йодышым 8(34783) 7-07-97 телефон дене рашемден кертыда.
Э-эх, шокталте! Марий тӱня помыжалтше!

И. ГУБАЕВ.
«Чолман» газет гыч налме

Добавить комментарий