Могай амал дене?

Таче кечывал лишан Йошкар-Ола администрацийыште ОМОН-ын обыскым ыштымыж нерген мут шарлыш. Чынжымак тушто мо ышталтын?
Правам аралыше органлаште, чынжым гын Марий Эл МВД-ште, тидын нерген умылтарымашым пуаш тореш лийыч. Но Марий Эл Следствий комитетыште могай-гынат увер дене палдараш тореш ышт лий. Тушто пален налме почеш, обыскым Москвасе ден Нижний Новгородысо Следствий комитетын еҥже-влак эртарат. Тудо мэр Павел Плотников шотышто тарватыме да шукертак мондалтше уголовный дела дене кылдалтын маныт. Администрацийын Муниципальный погым виктарыме шотышто комитетым вуйлатымыж годым тудо шке полномочийжым утыжым кугемден.
Марий Эл Следствий комиттетыштат тылеч утыжым ойлаш ышт тошт.
Мэрийын пресс-службыжат «умшаш вӱдым подылын». «Следователь-влак Муниципальный погым виктарыме шотышто комитетыште аренде да приватизаций дене кылдалтше документым тергат» манме дене гына серлагышт. Тиде пашам аренде ден приватизаций отдел председательын алмаштышыже Ю,Агапитован пӧлемыштыже ыштат. Полиций пашаеҥ ден следователь-влак кагаз документым веле огыл, тыгак электрнныйымат поген налыныт. Мэрын шинчыме пӧлемын шуыт але уке, эше пале огыл.
Икте раш: рӱдоласе вер гыч верыш кусаркалаш лийдыме погын, зданий-влакын посна еҥын кидыш моткоч шулдын куснымыжо шукертсек тургыжландара. Вет тудо бюджетыш миллион теҥге дене пайдам конден кертеш ыле. Лач тидыжак силовой ведомство-влакын еҥыштым мэрийыш тергаш конден.
Йошкар-Оласе мэрийыште обыск коррупций дене кылдалтше преступленийым шымлымаш дене кылдалтын. Спецоперацийым икмыняр тылзе ямдыленыт. Обыск тӱҥалме деч ятыр ончычак Йошкар-Олаш Россий МВД-н Экономикыште преступлений ваштареш кучедалше подразделенийжын оперативникше-шамыч толыныт, тыште кугу тергыме пашам шуктеныт. Чиновник-шамычым молан титаклат, кызытеш следствий ок ойло.

«Марий Эл» газет

Добавить комментарий