Финн-угор писатель-влак конгрессыш чумыргеныт

Сылнымут идалык тӱрлє мероприятийлан поян. Теве 2015 ий 3-7 сентябрьыште Венгрийын Бадачоньтомай олаштыже ХIII тӱнямбалсе финн-угор писатель-влак конгресс эртыш. Тудо 11 марий писательлан поро шарнымашым кодыш.

Конгресс, тӱня мучко кумдан палыме Балатон ер воктене, эртыш. Тудын темыже ты гана драматургий дене кылдалте. Тыге пашашке марий театр-влаклан кугу надырым пыштыше драматург-влак, Россий писатель ушем член-влак: Юрий Соловьёв, Александр Петров да Валерий Григорьев, Владимир Матвеев, тыгак поэт-влак Альбертина Иванова, Зоя Дудина, Лидия Иксанова, Татьяна Очеева, Игорь Попов, прозаик Валерий Бердинский да Марий Эл Республикысе писатель ушем вуйлатыше Светлана Архипова ушнышт.

Марий писатель-влак кок кече жапыште Будапешт оламат ончен савырнышт. Икымше кечын нунын дене пырля Будапешт университетыште марий йылмым туныктышо Татьяна Ефремова лие да чыла денат палдарыш. Писатель-влак тӱрлє верыште лийыч, турист-влакын коштмо уремыште верысе сатум нальыч, эсогыл Будапешт пазарыште чапым налше пловымат тамлышт, вӱд транспорт дене Дунай эҥер мучко ийын коштыч. Мутат уке, тыгодым шарнаш кодшо ятыр фотосӱретым ыштышт.

Конгресс 4 сентябрьыште саламлымаш да пленарный заседаний дене тӱҥале. Финн-угор писатель-влакым Венгр национальный ушемын президентше Ева Рубовски да Финн-угор писатель-влак ассоциацийын президентше Янош Пустаи писатель-влакым да чыла унам саламлышт.

Тиде кечынак Венгрийын госсекретарьже Ласло Л. Шимон конгрессыш погынышо-влакым поро увер дене куандарыш. Тудо Финн-угор писатель-влак ассоциацийын экс-президентше Арво Валтонлан Венгрий президентын орденжым кучыктыш.

Ласло Шимон 2008 ийыште Марий Эл Республикыште эртыше Х тӱнямбал финн-угор писатель-влакын конгрессышкышт делегат семын толын коштын, сылнымутшо марий йылмышкат кусаралтын.

Пленар погынымаште Юрий Соловьёв «Марий драме – калык чонын воштончышыжо» лӱман докладым ыштыш. Секцийыште Александр Петров, Светлана Григорьева, Зоя Дудина докладышт дене погынышо-влакым палдарышт.

Тиде конгресс вашеш кусарыше-влак чот тыршен пашам ыштышт. Тыгодым тӱрлє финн-угор йылмыла гыч почеламут ден ойлымаш-влакым марлаҥденыт. Конгресс годым «12 эн сылне венгр ойлымаш», «50 эн сылне венгр почеламут», «12 эн сылне марий почеламут» книга презентаций-влак эртышт.

Кок ий гыч, 2017 ий август тылзыште, черетан ХIV конгресс Эстонийыште, Тарту олаште, эртараш тӱҥалеш. Тудын темыже: «Историй кыша – сылнымутышто». А 2019 ийыште ХV тӱнямбалсе финн-угор писатель-влакын конгрессыштым Коми-пермяк округышто ышташ палемдыме.

Ешарыман, марий писатель-влакын корно роскотыштым Марий Эл Республикысе тӱвыра, печать да калык-влак шотышто министерство шке ӱмбакыже налын.

Автор: Светлана Архипова.

Добавить комментарий