Эртыше ÿмырем шарналтем

Мый 1933 ий 15 февральыште Шаран районысо Уялеш шочынам. 1939-41 ийлаште ешна Мишкан районышто илыш. Кугу Ачамландылык сар тÿҥалме кечын ачам, авам да мый сабантуй олыкышто ыльна. Тунам прокурорлан ыштыше ачамым, Аит Аитович Аюповым, вашке гына партий райкомыш ÿжыктен нальыч.

Еҥ-влакым сарыш ужаташ тÿҥальыч. Авам йот вереш илаш кодаш ыш келше: мемнам Мишкан гыч Уялыш кум имне дене конден кодышт. Тумарте яра шинчыше пöртыштына портышкемым ыштеныт улмаш — уло пöртым пар дене пытареныт.

Шошым пареҥге шындаш жап шуо, а мемнан тудо урлыкашлан гына огыл, кочкашат уке ыле. Еҥ-влакын пареҥге саратыме шÿкыштым, нерештарен,  мландыш оптышна. 15 сотык пакча гыч пÿкш кугыт 16 ведра пареҥге лекте. Авай уло-уке арвернам пареҥгылан вашталтыш. Коктын, Акпарсым, Усолам эртен, могай дыр ялыш миен, изорва дене пареҥгым шÿдырен толына ыле.

Мый йыдал тодаш тунемым. Лумым келын, чодыра гыч вич нымыштым налын кондемат, коҥгаш олтымо годым тудым пуштылам, вара сÿзлö дене копарен, нийым ямдылем ыле. Ик йыдаллан шым ний кÿлын. Кандыражымат шке пуненам. Пазарыште мыйын ыштыме йыдалым мотор улмыжлан кöра садешак налын пытареныт. Олмешыже шинчалым налын пöртылынам.

Колхозланат полшенна. Кÿртньö кольмо дене мландым кÿнчен, пареҥгым шынденна. Уржа-сорла годым пасуш кÿлта пидаш, пырчым шийме годым идымыште барабаныш кÿлтам шÿкен шогаш, пуалтыме шурным мешакыш темаш коштынам. Тыге изинек вий шутымо семын тÿрлö пашам шукташ логалын.

Мый Мишканыште икымше классым чыла «визытанлан» гына тунем пытарен тольым. А Уялыште икымше да кумшо, Урсайыште кокымшо да нылымше класс гына ыльыч. Урсайыш кошташ изирак улмемлан кöра Уялыште вигак кумшо классыш шындышт. Тунемаш нелырак лие гынат, тыршышым. Нылымше класс деч вара визымшыш Акпарсыш кайыман ыле. Кум ий коштым, но тунем пытарен шым керт. Кочкаш уке, пачерыште илет гын, пареҥге веле.

Мешерыште шымияш школым почмек, 1952 ийыште шым классым тунем лектым. Вара Октябрьский олаш вербоватлалтым, 6-шо чоҥымо-монтажный управленийыште пашам ыштышым. Идалык жапыште кидыштем эре кирка, кувалда да лом лийыныт. Тылеч вара комсомол путевка дене идалыклан Сталинград областьысе Волжский олашке гидроэлектростанцийым чоҥымашке кайышым. Тушто культура пöртыштö пашам ыштышым.

1954 ий сентябрь мучаште марлан лектым. Марием Астрахань ола гыч ыле. Еш дене, йöным кычалын, Уялыштат, Астраханьыштат илен коштна, пытартышлан Туймазаш верланышна. Марием 1962 ийыште 63-шо пожарный частьыш пашаш пурыш. Мый 20 ий янда заводын ампул цехыштыже пашам ыштышым. 1983-шо ийыште сулен налме канышыш лектым. Пелашем дене вич икшывым ончен куштышна. Ынде марием да кугу эргым ош тÿня гыч каеныт, кок эргым да кок ÿдырем улыт.

Заводышто эре ончыл пашаеҥ ыльым. «Профессий дене эн сай пашаеҥ», «Коммунистический пашан ударникше», «Индешымше вичияшын ударникше», «Соцтаҥасымашын ударникше» знак-влак да шуко Почетный грамота,  шуко икшывым ончен куштымемлан «Материнство медаль» дене  палемденыт.

З. ПАВЛОВА
Туймаза ола

Добавить комментарий