«Мый марла ойлем» акцийыш ушныза!

«Мый марла ойлем» акций ынде шым ий почела, кажне шошым эртаралтеш. Акцийлан негызым В. Колумб лӱмеш рӱдер-тоштер пеленысе «ВийАр» тӱвыра да келшымаш кыл ушем 2008 ийыште пыштен. Тиде ийынат «Мый марла ойлем» акций лиеш. Тудо 29 апрельыште 17 шагатлан Йошкар-Оласе  Чарласе  Кремльыште эртаралташ тӱҥалеш.
Акций Марий кундемын рӱдолаштыже ик тылзе шуйна. Самырык тукым кевытлашке, тунемме верлашке лектын коштыт, «Тыште марла мутланаш лиеш» наклейкым пуэдаш тӱҥалыт.
Акцийын тӱҥ шонымашыже: шочмо йылмым, тӱвырам арален да вияҥден шогаш.
Пайрем жапыште «Мый марла ойлем» акцийын палыже-влакым – значокым, «Марла кутырыктыш» буклетым – шаркалаш тӱҥалыт.
Мероприятий сылне концерт дене мучашлалтеш. Тунам сылнымут произведений-влак йоҥгалтыт, шуко куштымаш, мурымаш лиеш, викторине вуча.
Акцийым  Марий Элысе тӱвыра, печать да калык-влакын пашашт шотышто министерстве, «Чарласе Кремль» тӱвыра да историй комплекс, «ВийАр» тӱвыра да келшымаш кыл ушем,  Республикысе Самырык-влакын Правительствышт – калык-влак кокласе кылым вияҥдыме шотышто группо,  Республикысе Марий тӱвыра рӱдер эртарат.
Каласен кодыман, тыгай акцийым республикысе район ден олалаштат, марий-влакын тӱшкан илыме кундемлаштат эртараш лиеш. Тӱҥжӧ — акцийым эртараш кумыл гына лийже.

«ВийАр» тӱвыра да келшымаш кыл ушемын пресс-службыжо

Добавить комментарий