Кайык семын

Рвезе-влак коклаште республикыште сай результатым ончыктышо эше кок спортсменым палемдыман: Волжский районысо Сотнур села гыч Дмитрий Михайлов ден Морко районысо Кораксола гыч Александр Борисов.

Дмитрийын чытымашыжлан ӧраш да кӧранаш гына кодеш. Ечыгорнышто кайык чоҥешта, шонет: лум пурак кок век шыжалтеш. Марий Элыште шке ийготанже-влак кок- лаште икымше семын ойыртемалтеш, икмыняр ий тыршен ямдылалтеш. Тренерже – З.Ракеев. Еш команда дене район, республика, тыгак Россий кӱкшытыштӧ ялысе кеҥеж спорт модмаште вийыштым тергеныт, чолгалыкышт дене палынак ойыртемалтыныт. Кызыт Андрей изаж дене коктын ече спортышто республикын чапшым аралат.

–  Конешне,  сбор кӱлеш. Тидын деч посна ок лий, – манеш Руслан Сергеевич. – Сборышто тыршен ямдылалтме – результатлан кугу шӱкалтыш. Декабрьыште кум арня Сыктывкарыште лийын, январьыште Волжскышто ямдылалтын, а кеҥежым – Яльчикыште.

Ты тунемме ийыште Дмитрий Российын Ижевскыште эртыше первенствыштыже спринтыште 240  участник коклаште 7-ше верым налын. Тиде, мутат уке, моткоч сай кӱкшыт. Ӱмаште Марий Элыште шуко стартоватлен, а Россий кӱкшытыштӧ результатше начарештын. Ты тургымышто тӱҥ шотышто ӧрдыж кундемыште сай результатым ончыкташ  ямдылалтеш, вий-куатшым арала  манам гынат, йоҥылыш ом лий, шонем. Сандене «Российын ечыгорныжо-2011» ден «Марий Элын ечыгорныжо -2011» тӱшка стартлаште тудым ужмо огыл.

А тиде кечылаште эртыше Марий Эл чемпионатын 2-шо этапыштыже пӧръеҥ-влак коклаште (спринт йӧн дене) 11-ше лийын, икымше — тӱнямбал кӱкшытан спорт мастер А.Ямалеев. Но шке ийготанже-шамыч коклаште рвезе ӱшанлын икымше верыш лектын. Ты чемпионатын икымше этапше Волжскышто эртен. Туштат Дмитрийым иктат ончылтен кертын огыл. 14 ияш рвезын чылажат – ончылно, сандене ончыкшым эшеат сай деч сай кӱкшыт дене куандараш тӱҥалеш манын ӱшанена.

Е.Эшкинина

Снимкыште: Д.Михайлов — старт деч ончыч

Авторын фотожо

Добавить комментарий