Чулымлык ӱшаным кугемден

Йошкар-Олаште Россий Журналист-влак ушемын Марий региональный отделенийжын отчет да сайлымаш конференцийже лийын.

Кок ий ончыч угыч сайлыме верысе журналист организаций  вуйлатыше О.Старикован отчетшо деч поснат ушемыште шогышо 220 журналист сайын пала: ты жапыште паша палынак чулымештын, нунын кокла гыч ятырынже регионласе да Россий кӱкшытыштӧ эртаралтше тӱрлӧ оҥай да пайдале мероприятийыште лийын. Мутлан, ӱмаште Яльчикыште республикысе журналист-влакын фестивальышт, Татарстаныште регионласе да национальный СМИ-влакын IV конгрессышт, тӱрлӧ экскурсий-влак, молат моткоч келшеныт. Тышке нуно канаш веле огыл, а шке пашаштым саемдыме да вияҥдыме нерген мутланаш погыненыт.

Редакций-влаклан кызытсе саманыште илен лекташ неле, туге гынат Советский ден Морко, Волжский ден Шернур, южо моло райгазет-влак пашаштышт эреак уым кучылтыт. Тачысе кечын чыла газет — республиканский ден районысо-влакат — лудшылан кӱлеш, лудыт, сандене тиражышт ок изем манаш лиеш. Икте куандара: нуным кугыжаныш ок кудалте. Весе кумылым волта: журналист-влакын пашадарышт изиак кодеш, шочмо йылме дене лекше газет-влаклан марла чаткан возен моштышо самырык журналист-влак кӱлыт, лач нуныжым веле муаш куштылго огыл.

Кок ий жапыште республикысе журналист ушемлан ӱшан кугемын, тудым утларак пагалат, сандене у член-влакат ушемыш кумылын пураш тӱҥалыныт. Тидымат шотыш налын, Марий региональный отделенийын председательжылан уэш О.Стариковам сайлыме.

А.Андреев

Д.Речкинын фотожо

Добавить комментарий