Марий телевидений – ончыл радамыште…

5

Эртыше кечылаште Марий Эл Республикым вуйлатыше Леонид Маркелов ВГТРК-н «Марий Эл» кугыжаныш телерадиовещательный компанийыштыже лийын да телерадиостудий-влакын творческий коллективше, тыгак ВГТРК холдингыш пурышо финн-угор тӱнясе региональный телерадиокомпанийлан директоржо-влак дене вашлийын. Ты вашлиймашке ВГТРК-н генеральный директоржын алмаштышыже, региональный департаментшын вуйлатышыже Рифат Сабитов толын ыле.

Ончыч Марий Эл Республикым вуйлатыше филиалын производственный базыж дене палыме лийын. Тудлан эфирым вӱдымӧ павильоным, журналист-влакын телепрограммылан ямдылалтме пӧлемыштым, радиовещаний службым, аппаратно-студийный комплексым ончыктеныт. Республикысе радиостудийжым Российыштыжат ик эн ончыч да вич тылзе жапыште у оборудований дене пойдарен кертме. Кызыт тудо кум радиостанций — «Радио России», «Маяк» да «Вести ФМ» — гоч пашам ыштен кертеш. Предприятийын специалистше-влак кӱкшӧ технологиян оборудований дене пашам ышташат тунем лектын шуктеныт.

Марий телевиденийын студийжат у цифровой комплекс дене пойдаралтын. Тидыже телевизионный вещанийын качествыжым саемдаш полшен. У телевизионный производствын акше 123 миллион теҥгеш шуын.

– Республикыш толшо чыла инвестиций моткоч кӱлешан улыт. Мемнан республикысе телерадиовещанийлан вияҥаш кучылтмо окса калыклан качественный эфирым пӧлеклен. Тиде сай изображений гына огыл, но регионыштына лийше событий-влак нерген палдарен шогышо сай профессионал-влакын пашашт, — палемден Леонид Маркелов вашлиймаште.

Мучаште Марий Эл Республикым вуйлатыше «йыргешке ӱстел» воктене ВГТРК-н региональный телерадиокомпанийлажым вуйлатыше-влак дене вашлийын. Нуно Российысе национальный вещанийлан пӧлеклалтше семинар-совещанийыш толыныт ыле. Тушто регионлаште журналист-влакын пашашт, кучем ден нунын кылышт, телерадиоэфирлаште кеч-могай темым чын да раш почын пуымо шотышто да моло тӱрлӧ йодышым тарватеныт. Региональный теле-радиокомпанийлан вуйлатышыже-влак Йошкар-Оланан тачысе сынжым моктеныт, тышеч сай шарнымашым наҥгайыме нерген ойленыт.

Марий Эл Республик Вуйлатышын мер кыл ден увер виктемже
Кусарымаш — С.Носова (газет «Марий Эл»)

Добавить комментарий