Марий Оньыжа Волжский да Килемар район-влакым саламла

26 августышто Волжский ден Килемар район-влакым ыштымылан 75 ий темеш. Тиде пале дене Марий Оньыжа саламла.

— Волжский да Килемар кундемын пагалыме шочшыжо да ты кундемыште илыше-влак!

75 ий ончыч Марий кундемыште Волжский да Килемар район-влак шочыныт. Тудо жап гыч сылне кундем-влак шке илышышт дене илат да Шочмо элнам тӱзатымашке изи огыл надырым пыштен шогат.

Районласе калык Марий Элын экономикыжым, социальный илышыжым, тӱвыра поянлыкшым вияҥдымаште уло вийжым да мастарлыкшым пыштен тырша. Тыште тӱшка паша шижалтеш, тыгодымак посна еҥ-влакынат ыштыме сомылышт курымашлык.

Кеч-могай районын эн кугу поянлыкше – калык. Районышто шочын-кушшо да тиде кундемым чапландарыше ятыр еҥын лӱмжым ме курым-курымеш шарнена да кугешнена.

Таче ты кундемлаште ласкан илаш, чон канен пашам ышташ да каналташ чыла йӧн уло. Кундем-влак кажне кечын пеледалт да тӱзланен толыт. Нунын шкеныштын ойыртемалтше сынышт уло. Пӱртӱс денат, кумыл денат, сомыл денат чапланат.

Пагалыме Волжский да Килемар кундем калык! Умбакыжат калыкнан поянлыкшым арален кодаш да у паша дене элнан куатшым ешарен толаш тыланем. Тек кажне ешыште пиал да келшымаш озаланат, тазалыкда тумо гаяк пеҥгыде, кумылда поро да эреак нӧлтшӧ лиеш. Тек район-влакым чолга деч чолга еҥ-влак чапландарат. А кундемда эреак поян, сымыстарыше лиеш да шке шочшыжлан, илыше калыклан вияҥаш да куатым погаш полша.

Пайрем дене!

Марий Оньыжа Анатолий Иванов

«Мер канашын» сайтше гыч налме саламлымаш

Добавить комментарий