Тукым-влак иктеш чумыргеныт!

Звенигово районышто «Тукым вож» кугу мероприятий эртен.

Тиде районышто республикыште веле огыл, элна мучко чапланыше Эшпай, Ключников, Соловьев, Скворцов, моло тукым гыч еҥ-влак шочын-кушкыныт. Сандене нине ешла гыч мыняр лиеш, тунар шукырак еҥым чумыраш тыршеныт.

Толшо-влакым «Ӱшанлык» ансамбльын участникше-влак кинде-шинчал дене вашлийыныт. Нунын деч посна пайремыште «Марий сем», Чуваший гыч «Камыл», Свердловск областьысе Артин район гыч «Памаш» ансамбль-влак лийыныт да пайремыште ожнысо калыкын кузе илымыж нерген театрализоватлыме представленийым моткоч ойыртемалтшын ончыктеныт. Погынышо калыкын кумылжым мурен, куштен нӧлтымо дене пырля нуно кресаньык-влакын илышыштым: шудо солымым, вынер куымым, молым – модын ончыктеныт. А паша деч вара кажне кудо шкеж деке ӱжын да тӱрлӧ кочкыш-йӱыш дене сийлен.

Тунамак, тукым-влакын лӱмыштым возен, кувшиныш пыштен, тудым мландыш уреныт. А йоча-влак, тӱняште ласкалык да тыныс озаланымым палдарен, кавашке вараксим-влакым колтеныт. Самырык рвезе ден пӧръеҥ-влак гын чодыра гыч пушеҥгым конден шынденыт, ӱдыр-шамыч Какшан гыч налме вӱдым шавеныт.

Пайремыштак погынышо-влак икте-весышт дене эртышым шарналтен мутланеныт. Тидым ышташ тукым-влакын ондаксе фотографийыштат полшеныт.

Налме вер: gazetamariel.ru

Добавить комментарий