Сай вашталтыш чынжымак куандара!

Республикым вуйлатыше Л.Маркелов Звенигово районысо Красногорский поселкышко миен коштмыж годым регионышто ик эн кугу налогым тӱлышылан шотлалтше кок предприятийыште – Автофургон комбинатыште да «Электродвигатель» заводышто – лийын.

Кок предприятийжат производствым чарныде уэмден толеш. Мутлан, Л.Маркеловын комбинатыште пытартыш гана кодшо ий ноябрьыште лиймыж деч вара тыште кумда кок производственный корпусым: металл конструкцийлан сваркым ыштыше да панельым лукшо ден комплектоватлыше кузов-фургонлам вераҥдыме цехлам — пашаш колтеныт. Тылеч посна поселко да лишыл ялла гыч 120 еҥым угыч пашаш налыныт. Директор Р.Шагеевын мутшо почеш, тений производство кугыт 20 процентлан ешаралтын, тидлан кӧра предприятий 200 миллион наре теҥге налогым тӱлен.

— Автофургон комбинатыште лийын шогышо вашталтыш мыйым куандарыде ок керт, — палемден республикым вуйлатыше. — Пытартыш шым ийыште тыште 20 тӱжем утла квадрат метр у кумдыкым, кӱкшӧ технологиян производствым пашаш колтымо, пашадар ий еда кушкеш. Тидыже предприятийын пайдалын ыштымыж нерген ойла. Тудлан вияҥаш ончыкыжат полшаш тӱҥалына.

Бытовой техникылан, холодильниклан, медицине ден вентиляций оборудованийлан электродвигательым, специальный техникым лукшо «Электродвигатель» заводат сайын вияҥын толеш, 100 утла тӱрлӧ продукцийым луктеш. Л.Маркелов-лан угыч налын шындыме станок-шамычым ончыктеныт. Тений гына фрезан станокым, токарный обрабатыватлыше центрым да силовой трансформаторым налыныт. Кызыт у продукцийым – Россий Миноборонылан йӱкшыктарыше вишкыдым тулаш насосым – лукташ ямдылалтыт.

— Завод верыште ок шого, тиде сай. Тений икымше пелийыште предприятий 300 миллион теҥгеаш сатум луктын, 70 миллион теҥге налогым тӱлен, — палемден Л.Маркелов. – Тыгайже але марте лийын огыл ыле.

Завод пашаеҥ-влак дене вашлийме годым нуно верысе корным олмыкташ, Красногорскийысе поликлиникым уэш пашаш колташ, физкультурно-тазаҥдыме комплексым чоҥаш полшаш йодыныт. Республикым вуйлатыше йодмым шукташ сӧрен.

Марий Эл Республик Вуйлатышын мер кыл ден увер виктемже
Кусарымаш — А.Андреев (газет «Марий Эл»)

Добавить комментарий