Куатше ийын вияҥ толеш Медведево районысо Силикатный посёлкышто шушаш ийын йочасад ден паркым ыштат!

Тидын нерген Марий Эл Республикым вуйлатыше Л.Маркеловын Марий силикат кермыч заводышто тыршыше-влак дене вашлиймыж годым пале лийын.

Ты предприятий, ынде вашке 58 ий лиеш, республикысе пӱтынь чоҥышо отрасльлан силикат кермычым, пырдыжлык изирак газосиликат блокым да кукшо чоҥымо вартышым ситарен шога.

Суткаште кызыт МЗСК 400 тӱжем кермычым ышта. Куатше эреак кушкын толеш. ™маште завод 90 миллион кермычым луктын гын, тений шым тылзыште куатше 20 процентлан кушкын. Сатужым Марий Элыште веле огыл, пошкудо Татарстаныште, Чувашийыште, Киров, Владимир, Нижегородский областьлаштат кумылын налыт.

Завод директор А.Моисеевын мутшо почеш, эртыше кум ийыште производствым вияҥдаш 80 миллион теҥгем кучылтмо. У автоклавым, прессым, газопоршневой генераторым, коштышо барабаным, шлифоватлыше машинам да моло оборудованийымат налме.

Газогенераторым налмылан кӧра завод 30 процент электровийым шканже ситара, а у пресс сайрак качестван сатум шукырак лукташ йӧным ышта.

— Марий силикат кермыч заводын чоҥымо материалже республикысе чыла программым илышыш шыҥдараш полша. Школым, йочасадым, больницым ыштымаште ты заводын сатужо кучылталтеш. Чоҥымо индустрийын талын вияҥмыжлан кӧра предприятий вуйлатыше-влак лукмо кермычыштым кушко ужалыме шотышто огыт тургыжлане. Пытартыш ийлаште силикат кермычын йӧршын вес качествыж нерген кутырен кертына. Еҥ-влак сылне пӧртыштӧ илынешт, сандене заводын чыла сатужат йодмаш дене пайдалана, социальный объект-влакымат ме тудын кермычше денак чоҥена, — палемден Марий Эл Республикым вуйлатыше Л.Маркелов.

Верысе кучемын полышыж деч посна огыл заводышто жаплан келшыше оборудований ден у технологиян линий пашам ышташ тӱҥалыныт. «Республикын правительствыже мыланна чотак полша, — келша заводын директоржо А.Моисеев. – Газопоршневой двигательым кредитын процент ставкыжым компенсироватлаш полшымек веле налын кертына. Ынде тудо мыланна кугу пайдам конда».

Кызыт производствышто вичшӱдӧ наре еҥ тырша. Нунылан чыла йӧным ыштыме. Эсогыл саунышт уло. Пашадарат келшыше да жапыштыже тӱлалтеш, тылзе еда премийым пуат, илыме верым саемдаш шонышо-влаклан полшат. Икманаш, социальный политике тыште – ончыл верыште. Силикатныйыште йочасадым ыштыме нерген мут лекмек, завод директор чоҥышаш материалым шулдыракын колташ сӧрен.

Марий Эл Республик Вуйлатышын мер кыл ден увер виктемже
Кусарымаш — Е.Садовин (газет «Марий Эл»)

Добавить комментарий