Тырше веле – йӧн ынде сай

Волжский районысо Чодыраялыште у технологий почеш чоҥымо фельдшер-акушер пунктым торжественно почмо.

Тиде ФАП Чодыраял да Нурмучаш ялласе калыклан, 1300 утла еҥлан, медицине полышым пуа. Тушто ондаксе семынак ныл пашаеҥ – фельдшер, акушерке, физиотерапийын медсестраже да санитарке – пашам ышташ тӱҥалыт. Эше 1937 ийыштак чоҥымо медучрежденийыштыже физиотерапевтический процедур эртаралтын огыл, ынде тидланат йӧн лектын. «Волжск оласе эмлымвер марте –65 меҥге. Кажныжак тушко шонымо семын каен огеш керт, сандене чапле ФАП-ым чоҥымылан ме моткоч куаненна», — манын Волжскысо рӱдӧ райбольницын тӱҥ врачше Д.Фризин.

Фельдшер-акушер пунктышто тӱҥ шотышто калыклан тӱҥалтыш медико-санитарный полыш пуалтеш, тыгак посна категорий еҥ-влакын, икшывын, мӱшкыран ӱдырамашын, хронический черлын тазалыкыштым эскерат. Тудын негызешак тыште ынде аптеке пункт почылтеш. Еҥ-влаклан райрӱдыш але Йошкар-Олашке эмым налаш коштмо огеш кӱл.

ФАП-ын кумдыкшо — 230 наре квадратный метр. Пашаеҥ-влаклан тыршашышт, тышке толшо-влакланат сай йӧн ышталтын. Коляске дене коштшо инвалид-влак пандус дене нелылык деч посна тышке пурен кертыт. «Марспецмонтаж» ОАО-н пашаеҥже-шамыч зданий йыр тӱзаташ монден огытыл: асфальтым шареныт, клумбым пеледыш сӧрастара.

— Мыланем чылажат келша, чоҥышо-влак молодец улыт, — палемден республикым вуйлатыше Л.Маркелов. – Тӱҥалтыш медицине полышым пуаш тыште чылажат уло. Медик-влак гына тыршен ыштышт. ФАП-влакым чоҥымо пашам ме умбакыжат шуена. Нуно типовойлан шотлалтыт гынат, икте-весышт деч ойыртемалтыт. Вашке Шарачаште медицине пунктым нӧлтен шуктат, вес ийын Упшер кундемыште, Купсолаште, Кӱсолаште чоҥаш тӱҥалыт.

— Тошто фельдшер-акушер пунктышто пашам ышташ пеш неле ыле: прививкым, уколым ышташ, ӱдырамаш-шамычым тергаш посна пӧлем лийын огыл. Ынде мыланна вӱдым нумалаш, коҥгаш олташ огеш кӱл, еҥ-влаклан утларак тӱткышым ойыраш тӱҥалына, — тауштен ойлымыж годым манын Чодыраял ФАП-ым вуйлатыше З.Семёнова.

Марий Эл Республик Вуйлатышын мер кыл ден увер виктемже
Кусарымаш — Л.Иванова (газет «Марий Эл»)

Добавить комментарий