Марий-влак Шогертен идалыкым вашлияш ямдылалтыт

Православный верам кучышо-влак Ӱярня деч вара пӱтым кучаш тӱҥалыныт гын, чимарий-влак тудлан да У ийым, Шогертен идалыкым вашлияш ямдылалтыт веле.

Тиде кечыже 22 мартыште лиеш. Марий-влакын пӱтышт вестӱрлӧ, тудо койыш-шоктыш, шкем кучен моштымо да пӱртӱсым пагалымаш дене кылдалтын. Мутлан, марий пӱтӧ годым чодырам руаш, колым кучаш, сонарыш кошташ ок йӧрӧ. Тыгак кугу пашам огыт тӱҥал, пайремым да сӱаным огыт эртаре. Эн тӱнжӧ – ваш-ваш туманлымашым кугу сулыклан шотлат. Тӱҥ онаеҥ Александр Таныгин тыге ойла: «Пырчым ӱдымӧ деч вара тудын шытен лекмешкыже пӱтӧ годым пасу воктене йӱк-йӱаным огыт тарвате. Пӧрт гычат шӱк-куштырам огыт кышке, а шыркам колтымо годым пурак ынже нӧлталт манын, писын кудалышташ огыт шӱдӧ». Кочкыш шотышто уто чарак уке, чыла кочкаш лиеш, вет марий-влак тиде пагытыште шошо агалан вийым погышаш улыт. Тыгодым ӱстембалне эре шергинде да кум тӱрлӧ шӱраш гыч шолтымо пучымыш.

Акрет годсо марий кечышот почеш Шогертен идалыкыште сӱаным ышташ да ешым погаш шотлан толеш.

Валерий Очеев

Добавить комментарий