Курчак театр вашке омсажым почеш!

Марий Эл Республикым вуйлатыше Л.Маркелов чоҥалтше республиканский курчак театрыште производственный совещанийым эртарен. Тушко театрым чоҥышо подряд организаций-влакын вуйлатышыштым, проектын авторжо ден заказчик велым еҥ-влакым ӱжыныт.

Тунамак театрым торжественно почмо кечым палемденыт. Тиде — 12 сентябрь. Чоҥалтше объектым ончен савырнышыжла, Л.Маркелов чоҥышо-влаклан икмыняр уто-сите нерген шижтарен. Нуным палемдыме кече марте кораҥдыман. Тиде уто-ситыже тӱҥ шотышто театр йыр улшо кумдыкым тӱзатыме, тудым волгалтарыме да видео-эскерыше системым, локтылмо деч аралтышым вераҥдыме дене кылдалтше лийыныт.

— Ме Российыште эн сай курчак театрым чоҥена. Сур тӱсан тыглай оралтым огыл, а икшывына-влак-лан культур полатым. Сандене, конешне, чоҥымо годымак экшыкым кораҥдаш келшен толшо ятыр йодыш лектынак шога. Мыйын палемдыме уто-ситым кораҥдыме график ышталтеш, тудым, ӱшанем, чоҥышо-шамыч шуктат. А 12 сентябрьыште республикысе икшыве-влаклан ме чынжымак пайремым пӧлеклена, — совещанийым иктешлышыжла манын Л.Маркелов.


Марий Эл Республик Вуйлатышын мер кыл ден увер виктемже
Кусарымаш — Е.Садовин (газет «Марий Эл»)

Добавить комментарий