САМЫРЫК ПОЭТ-ВЛАКАН «СВЕТЛАНА» КОНКУРС!

Светлана Эсаулова лӱмеш фондын учредительже-влак самырык поэт-влак коклаште талук еда эртаралтше «Идалыкын эн сай почеламутшо» конкурсым кум тылзе ончычак увертареныт. «Светлана» лӱман сылнымут премий верч конкурсыш ушнышо авторлан тений 15-ше октябрь марте 30 ий темшаш огыл. Кажне автор деч визыт деч шуко огыл почеламутым налыт, кажне почеламутшо 32 корно деч кугу огыл лийшаш. Почеламут дене пырля конкурсышко ушнаш йодмаш пуалтеш. Тушто шке нерген увертарыман: лӱм, фамилий, ачалӱм, илыме вер, вашкылым ышташ телефон номер, шочмо кече, электрон адрес. Произведений-влак савыкталтыныт гын, ксерокопийжым колташ лиеш. Конкурслык материалым почто дене, тыгай адрес дене 15-ше август гыч 15-ше сентябрь марте колтыман: 424032, Йошкар-Ола, Сталинград кредалмашын геройжо-влак урем, 8-ше пӧрт, 32-шо пачер. «Светлана» литератур конкурсын премийже – 25 тӱжем теҥге (налог деч посна). Тудо Светлана Николаевна Эсаулован шочмо кечынже – 15-ше октябрьыште кучыкталтеш. Конкурсышто сеҥыше самырык поэт-влаклан налме окса дене икгай форматан сборникым савыктен лукташ темлалтеш. Окса шагалрак лиеш гын учредитель ешартыш полышым пуэн кертеш.

Налме вер: «Марий Эл Радио» ден «Кидшер»

Добавить комментарий