Ола ару да мотор лийже манын тыршат!

Марий Эл Республикым вуйлатыше Л.Маркелов рӱдоласе уремлам, тӱшкан пайдаланыме верлам да чумыр Йошкар-Олам сайын кучымылан вуйын шогышо «Ола» муниципальный унитарный предприятийыш миен коштын.

Тидын годым Марий Элым вуйлатыше уремым телым да кеҥежым эрыкташ кучылталтше технике могай да мыняр улмо дене палыме лийын. «Ола» МУП-ын вуйлатышыже-влакын ойлымышт почеш, рӱдоласе урем ден корнылам йытыраяш да олмыкташ кӱлшӧ спецтехнике ситышын, 133 единице, уло. Южыштыжо спутник йӧн дене эскерыме системым келыштарыме. Л.Маркелов предприятийыште «Глонасс» системе дене пайдаланымым аклен. Муниципальный предприятийыште тыршыше-влак тудын кузе пашам ыштымыжым, уремым эрыктыше машина ден моло техникын графикым шуктымыштым ончыктеныт.

— Таче коллектив дене ме кок тӱҥ йодышым каҥашышна. Тиде — Йошкар-Оласе урем ден корнылам сайын кучышашлан оксам ситарыме да, тарифым кугемдыде, республик ден муниципальный бюджет кӱшеш лумым эрыктыме, вӱдым шавыме машина ден газонокосилкым налме йодыш, — манын Л.Маркелов.

2015 ийыште предприятий жаплан келшыше асфальтым шарыме машина ден у катокым налаш палемден. Йӧн лиеш, кучем полшаш сӧрен. Эртыше кечылаште лийше Кугыжаныш Погынын сессийже деч вара пале лийын: шушаш ийлан корным олмыкташ да тудым сайын кучаш республикын бюджетше гыч 200 миллион теҥге ойыралтеш. Тидыже тенийсе деч 75 миллион теҥгелан шукырак.

«Ола» МУП-ын пашаеҥже-влак дене мутланымыж годым республик вуйлатыше эше ик йодышым тарватен. Тиде — Йошкар-Оласе кудывечым, паркым, сквер ден бульварым жапыштыже эрыктымаш. Л.Маркеловын ойлымыж почеш, тусо санитарный состояний эрежак палемдыме нормылан келшен толшо огыл. Тидыже еҥ-влакын культурышт денат кылдалтын.

— «Ола» МУП – тиде путырак кӱлешан предприятий. Таче йолагай веле тудым огеш вурсо. А еҥ шкежак тамак пундашым але кампет кагазым мландыш кышка гын, ола яндаррак огеш лий. Сандене еҥ-влак шкештак арулыкым эскерышаш, культурныйрак лийшаш улыт, — шонымашыжым луктын ойлен Марий Эл Республик вуйлатыше Л.Маркелов.

Тудо оласе коммунальный службын пашажым сай могырым гына аклен да моштен виктарымылан кӧра олам арум кучымо паша воранен толмым палемден.

Марий Эл Республик Вуйлатышын мер кыл ден увер виктемже
Кусарымаш — Е.Садовин (газет «Марий Эл»)

Добавить комментарий