Морко районышто у ФАП почылтын!

Морко район Кокласолаште у фельдшерско-акушерский пункт пашам ышташ тӱҥалын. Тудым палемдыме деч ондакрак, ныл тылзыште, чоҥен шуктымо.

У медицине учрежденийым почмашке Марий Эл Республикым вуйлатыше Л.Маркелов миен. Тысе лу наре йоҥгыдо кабинет Кокласола ял шотан илемысе 1,5 тӱжем еҥлан икымше медицине полышым пуаш келыштаралтын. Изи Корамас, Арын, Кӱчыкэҥер, Кожлаер яллаште илыше-влаклан ынде райрӱдыш коштын толашышаш уке.

Республик вуйлатыше Л.Маркеловын мутшо почеш, медициным вияҥдымаш, еҥ-влаклан жапыштыже полышым пуымо пашам ворандарен колтымаш – Марий Эл правительствын ик эн ончыч шуктышаш сомылжо радамыште. Тений республик мучко 15 ФАП-ым почмо. Вес ийын эше 20 -ым почаш палемдыме, 2016 ийыштат – тынарак. Тидлан окса республикын бюджетше гыч ойыралтеш.

— Таче ме «илышын качествыже» умылымаш нерген ойлена, но тидлан экономикым нӧлтал колтыман. Эртыше ийлаште пеш кугу вашталтыш лийын. Мутлан, мыйын республикым вуйлаташ тӱҥалмем годым кокла пашадар тӱжем теҥге утларак веле лийын да тудыжымат жапыштыже тӱлен огытыл. Таче кокла пашадар 20 тӱжем теҥге наре. Тидыжым экономикым вияҥдымылан кӧра ыштен кертме. Предприятий-влак налогым жапыштыже тӱлат, тугеже ме социальный объектым чоҥен кертына. Таче ме тиде пашан лектышыжым ужына. Медицине полыш калык деке лишкырак лийын, — манын Марий Элым вуйлатыше Л.Маркелов.

— Тиде – верысе калыклан веле огыл, мыланнат кугу куан, — ешарен Морко ЦРБ-н тӱҥ врачше О.Романенко. – Тошто оралтыштыже пашам ышташ огеш лий ыле, поснак – телым.

Амбулаторийыштак районысо рӱдӧ аптекын аптек пунктшо почылтеш. Эмым налаш еҥ-влаклан райрӱдыш шумеш кошташышт огеш кӱл.

Верысе калык дене мутланымыж годым республик вуйлатыше еҥ-влакым тургыжландарыше быт йодышым решатлаш тидлан вуйын шогышо-влаклан кӱштен. Сарын ветеранже, сулло врач, Морко районышто кумдан палыме хирург Сергей Николаев Л.Маркелов деч врач-влаклан пӧртым чоҥаш полшаш йодын. Марий Элым вуйлатыше нунылан веле огыл, чумыр бюджет сферыште тыршыше-влаклан районышто илыме верым чоҥымо йодышым лишыл жапыште ончена да тидлан оксам муына манын вашештен.

Тыгак верысе калык республик вуйлатыше деч Арын селаште Воскресный школым чоҥен пытараш полшаш йодын. Тудым калык шке оксаж дене чоҥен. Кызыт тушто кӧргӧ пашам шукташ кодын. Л.Маркелов тидлан вуйын шогышо еҥ-влак ден чоҥышо организаций вуйлатыше-шамычлан ты православный образовательный учрежденийым чоҥен пытарашышт полшаш кӱштен.

Марий Эл Республик Вуйлатышын мер кыл ден увер виктемже
Кусарымаш — Е.Садовин (газет «Марий Эл»)

Добавить комментарий